Раил Мараков: “Бөтен бирелгән бүләк тә, дипломнарга чаклы кадерле”

“Кайсы авыррак, Сабан туен оештырумы, әллә көрәшүме?” – дип сорагач, бик озак уйлап торганнан соң, икесе дә, дип куйды көрәш батыры.
Быел аның икенче тапкыр җиңүе икән. Баландыш сабантуенда да баш батыр исеменә лаек булган. Иң истә калган җиңү дә 18 яшендә Баландыш сабантуендагысы, ди ул. 

2014 ел да аның өчен шактый истәлекле булган. Томскида федераль сабантуенда һәм шул ук елны Волгоградта бөтенроссия авыл сабантуенда абсолют батыр дип табылган. Шуннан соң Раил травма алып, көрәшми тора. Дүрт ел мәйданга чыкмый тору көрәш дәртен сүндерә алмаган. Көрәш келәменә чыгарга теләгән чаклары күп булган. 

Моннан тыш Иске Җөри авыл җирлеге башлыгы булып эшләгәндә дә, Теләче авыл җирлеге башлыгы да булгач та сабантуйларында бик катнаша алмаган. “Район Сабан туе – шимбә, авылларда ял көне булгач, аны оештыру артыннан йөреп, келәмгә бик чыга алмадым” ди. Әйтүенчә, бәйрәмне оештыру да, көрәшү дә икесе дә көч-энергия таләп итә. “Эшләгәндә эш өчен, көрәшкәндә көрәш өчен борчыласың” ди.