Табибларга янә рәхмәт әйтергә өйрәндек. Бәйрәм белән, кадерлеләребез!

Совет чорында һәр ике баланың берсе табиб булырга теләгәндер, мөгаен. Без бәләкәйдән табиблардан (дөресрәге алар ясый торган уколлардан) куркабыз, әмма аларга һәрвакыт тартылабыз һәм еш кына мөрәҗәгать итәбез. Алар исә тәүлекнең теләсә кайсы вакытында кеше гомере өчен көрәшергә әзер.

Әниемнең йөрәге еш авыртканга күрә, без бик еш авылның фельдшерларына мөрәҗәгать итә идек. Алар өйгә килеп кергәнен барыбыз да дүрт күз белән көтеп торабыз. Әйтерсең лә табиб килеп керүгә үк әнинең хәле җиңеләячәк. Юкка гына аларны ак халатлы фәрештәләр дип атамыйлардыр. Дөрестән дә, Оркыя апа яисә Рәмилә апа килсә, безгә дә җиңелрәк булып китә, нәкъ фәрештә канатын җәйгән төсле.

Төнге сәгать өчме, иртәнге җидеме, минем эш сәгатем башланмаган яисә инде төгәлләнде дип тормыйлар, шунда ук килеп җитәләр. Бу безнең авылда гына түгел, теләсә кайсы авыл фельдшерлары да шулай эшли.

Быел табибларның җилкәсенә тагын коронавирус дигән зәхмәт тә ятты. Аларның инде бөтенләй төшеп беткән дәрәҗәсе күзгә күренеп артты. Табибларга без кабат рәхмәт әйтергә өйрәндек. Дәүләт тә аларның хезмәтен матди яктан да бәяли башлады. Пандемия бетеп, барысы да тәмамланганнан соң да (ә бездә гадәттә сугыштан соң батырлар онытыла) ул дәрәҗәне төшерми, табибларга булган хөрмәтебезне кесәләренә конверт рәвешендә генә түгел, ә сүз белән, чын күңелебездән әйтергә оялмасак иде. Кайчагында авырулары яныннан арып чыккан табибка җылы сүз әйтү дә аның хәлен җиңеләйтә. Гомумән, җылы сүз, яхшы мөгалләмәнең дәвалау сәләтенә ия булуын раслап тору кирәк тә түгел. Шуңа да табибларга рәхмәтебезне, җылы сүзләребезне кызганмыйк!

21 июнь табиблар һөнәри бәйрәмнәрен билгеләп үтә. Намуслы хезмәт итеп, сәламәт яшәргә язсын үзегезгә! Сәламәт яшәүдән дә кадерле нәрсә бар?!

Лилия ЛОКМАНОВА.