Гомер озынлыгы буенча Татарстан 11нче урында

Авыл җирлекләрендә 70 меңнән дә ким алмыйлар, эшләргә кеше генә табылмый.

Татарстанлыларның гомерен өзгән өч сәбәп – кан әйләнеше системасы авырулары, онкология һәм медицина белән бәйле булмаган тышкы сәбәпләр (алкоголизм, юл һәлакәтләре һ.б.) 

Авыл халкы, авырма син! 
Татарстан Сәламәтлек саклау министры Марсель Миңнуллин республикада гомер озынлыгын арттыру һәм үлүчеләр санын киметү беренчел ярдәм күрсәтүнең нәтиҗәлелегенә бәйле булуын билгеләде. Шуңа күрә авыруларны кисәтүгә һәм яшәү сыйфатын арттыруга күп көч куела. Быел бу максатларга 448 миллион сум акча бүлеп бирелгән. Табиблар медицина ярдәме аксаган ерак авыл җирлекләренә барып, скрининглар үткәрә һәм мәгълүматларны район хастаханәләренә җиткерә. Быелның 7 аенда шул рәвешле 20 меңнән артык кеше тикшерү узган, шуларның 14 процентында төрле авырулар ачыкланган, бер төркем кешегә кичекмәстән хастаханәгә ятарга киңәш ителгән.

Беренчел звеноны модернизацияләүгә дә республика бик җитди карый. Быел моңа 2,4 миллиард сум бүлеп бирелгән. Бу акчаларга 28 сәламәтлек саклау объекты, шул исәптән 3 поликлиника төзелә. 117 объектта капиталь ремонт уздырыла. Шулай ук яңа медицина җиһазлары сатып алу да каралган.
Медицина ярдәмен халыкка якын итү эше шулай ук күп еллар игътибар үзәгендә. 2012-2022 еллларда 658 ФАП төзелгән, 47 табиб амбулаториясе булдырылган. 

Бина түгел, кешеләр дәвалый
Әмма салада ФАП төзү белән генә халыкның сәламәтлеген яхшыртып булмый. Дәвалаучысы булмаса, бина төзеп куюдан мәгънә юк. Ә кадрлар мәсьәләсе, чыннан да, кискен тора. Ел сан республикада меңгә якын медицина хезмәткәрләре укытып чыгарылса да, авылга кайтып эшләргә теләүчеләр бик аз. Күбесе шәһәрдә калу ягын карый. Нәтиҗәдә, ФАП бар, ә эшләргә фельдшер юк. Әлегә проблема бер фельдшерның күрше-тирә авылларны үз карамагына алу хисабына хәл ителә. Яшьләр авылга хезмәт хакы түбән булганга кайтмый дияр идең, әмма министр моның ялгыш фикер булуын әйтте. Авыл җирлегенә кайтып эшләгән яшь белгечкә өстәмә социаль түләүләр каралган. Нәтиҗәдә, шәһәрдәге зур медицина үзәкләрендә эшли генә башлаган табибның хезмәт хакы 55-60 мең тирәсе булса, авыл җирлекләрендә 70 меңнән дә ким алмыйлар, дип белдерде Марсель Миңнуллин.