#Сәламәтлек 04 май 2016, 14:06

Талпаннар котыра

04 май 2016, 14:06

Командировкага баргач, Югары Ослан районындагы Кызыл Байрак авылына килеп керүгә, машина йөртүчебез Альбертка талпан төшәргә дә өлгерде. Югыйсә, урман юк, агачлыклар да еракта. Баксаң, быел талпаннар аеруча да котырганнар икән. Татарстанның Роспотребнадзор идарәсе мәгълүматлары буенча, сезон башыннан бирле быел талпаннан зыян күргән 130лап кеше теркәлгән. Былтыр бу сан 19 гына...

Скопировать ссылку

Интернетта исә социаль челтәрләрдә талпан аша иярергә мөмкин булган авыруларга каршы прививкалар тәкъдим итәләр. Уколның бәясе дә очсыз түгел- 1500 сумга кадәр. Иммунитетны ныгыту өчен шундый ике укол кадатырга кирәк, имеш. Табиблар исә прививканы куе урманнарга җыенган кешеләргә генә салдыру кирәк дип саный, ә табигать кочагына ял итәргә чыгучыларга гади кагыйдәләрне үтәү дә җитә - мөмкин кадәр ябык киенергә, тәнгә бөҗәкләргә каршы крем, мазь сөртергә кирәк. Талпан тәнгә кергән очракта хастаханәгә барырга киңәш ителә. Энцефалит вируслы талпан кеше сәламәтлеге өчен зыянлы. Моны бөҗәкне анализга тапшырып кына ачыкларга була. Казанда бу хезмәтне Эпидемиология һәм гигиена үзәгендә башкаралар. Авыру талпан кешегә кергән очракта тиз арада махсус укол ясатырга туры киләчәк. Табиблар антибиотиклар да эчәргә кушарга мөмкиннәр.

Кызыклы яңалыкларны күзәтеп бару өчен безнең МАХ каналына кушылыгыз.

#250