Үзбәкстан Республикасы Президентын сайлау башланды

Казан федераль университетының Физика институты корпусында 29 июньдә Үзбәкстан Президентына алдан тавыш бирергә мөмкин.

— Казан федераль университетында 4 мең үзбәк егете һәм кызы белем ала. Татарстан Республикасында 14 меңнән артык Үзбәкстан гражданы яши, эшли яки белем ала. Күчмә сайлау участоклары шәһәрләргә һәм районнарга чыгып, ватандашларга  тавыш бирү мөмкинлеге тудыра. Казанда тагын 2,3 һәм 4 июльләрдә үзбәкләр эшләгән предприятиеләрдә алдан тавыш бирү оештырылачак. Төп тавыш бирү көнендә-9 июльдә Спартак урамы, 6 адресындагы бинада тавыш биреп була. Алдан тавыш бирүгә шартлар тудырганнары һәм теләктәшлек күрсәткәннәре өчен Татарстан җитәкчелегенә һәм ВУЗларга рәхмәт! - диде Үзбәкстан Республикасының Казандагы Генераль консуллыгының 1нче секретаре Камол Давронов.

— Казанда укытучы белгечлегенә укыйм. Үзбәкстан - минем Ватаным. Үзбәкстан Президентын сайлау кебек олы вакыйгадан читтә кала алмыйм, горурлык хисендә һәм дулкынлану кичереп тавыш бирдем. Үзбәкстанның бүгенгесе һәм киләчәге матур булсын! - диде студент үзбәк кызы Мәүлидә Алламбиргәнова.

Физика корпусы үзбәк җырларына һәм көйләренә күмелде. Аларга рус һәм татар фольклор коллективлары да кушылды.

 —Үзбәкстан соңгы 5-6 елда колачлы яңарыш кичерә. Үзбәкстанга кунакка, туристлык сәяхәтләренә килегез, бездә борынгы-матур шәһәрләр күп. Аралашып, дус булып яшик,- диде Камол Давронов.