Чебигә дә субсидия бирәләр

- Быел беренче тапкыр шәхси хуҗалыкларда үстерелүче кош-корт өчен дәүләт субсидия бирә. Бройлер чебиенең һәр башына - 30 сум, үрдәккә - 80 сум, каз белән күркәгә - 100 сум. Субсидия алуның билгеле бер шартлары бар: кош-кортларны 1 июньгә кадәр республика территориясендә урнашкан кош-корт хуҗалыклары, инкубаторларыннан гына алу зарур һәм аларның яше 1 айдан артмасын. Тагын бер шарт - кош-кортларның саны 50дән алып 100гә кадәр булырга тиеш. Субсидияләр күләме сатып алынган яшь кош-корт хакының 50 процентыннан артмаска тиеш, транспорт чыгымнары субсидиягә керми. Сатып-алу килешүе төзелгәннән соң, чеби, үрдәкне кимендә ике ай, каз белән күркәне дүрт ай асрау мәҗбүри, - дип сөйләде ул безгә.

Субсидия алу өчен 1 июньгә кадәр район башкарма комитетына гариза язасыз. Анда түләү реквизитлары, сатып алынган кош-кортның һәр төре буенча баш саны, почта адресы һәм сатып алынган яшь кош-кортның сакланышын тәэмин итү бурычы күрсәтелергә тиеш; сатып алынган кошлар өчен түләүне һәм кошларның кошчылык хуҗалыкларыннан сатып алынуын раслый торган документларның (сатып-алу килешүе, кабул итү-тапшыру актлары, түләү кәгазьләре (квитанция яисә касса чегы), накладнойлар һәм ветеринария белешмәләре) күчермәләре, шәхси ярдәмче хуҗалыкларның хуҗалык исәбе кенәгәсеннән яшь кошларны министрлык тарафыннан расланган рәвеш буенча исәпкә кую фактын раслый торган өземтә тапшырыла.

Кош-кортлар, куелган таләпләрдәге вакыттан алда авырудан үлгән очракта, башкарма комитетка ветеринария белешмәсен һәм бракка чыгару турындагы актны тапшырасы була.

Ольга Петрова сүзләренә караганда, субсидия алырга теләүчеләр шактый.

- Күрше - күршесеннән күреп тә, дусты танышыннан ишетеп тә киләләр. Субсидия бирүнең дә максаты - кош итен җитештерү һәм сату күләмен арттыру. Күп булган саен яхшы, - ди ул.

Моннан тыш, Татарстан Авыл хуҗалыгы һәм азык-төлек министрлыгы тарафыннан шәхси ярдәмче хуҗалыкларны үстерүгә ярдәм итү максатыннан да субсидияләр биреләчәк (районнар билгеләгән лимитлар кысаларында). Шәхси ярдәмче хуҗалык тотучы гражданнарга сөт юнәлешендә мини-фермалар төзүгә, таналар сатып алуга, токымлы ана кәҗәләр сатып алуга, сыерларны ясалма орлыкландыру хезмәтләрен күрсәтү чыгымнарын каплауга, өч яшьтән зуррак булган үгезләрне тоту өчен азык сатып алуга, сыерларга профилактик ветеринария хезмәтләре күрсәтү чыгымнарын каплауга субсидияләр алырга мөмкин.

^{Зөлфия Хәлиуллина фотосы}