«Яңа дулкын» Латвияне Казанга алыштырырмы?

- Соңга калган кунак - начар, тоткарланган кунак аннан да начаррак, дип әйтә халык. Соңгы вакытта Латвиянең Россиягә карата мөнәсәбәтен анализласак, үзебезне бу илдә тоткарланган кунак дип хис итәбез. Латвия тыюлары аркасында, Россиянең мәртәбәле артистлары Иосиф Кобзон, Олег Газманов, Валерия быел «Яңа дулкын» бәйгесенә кертелмәячәк, - дип көрсенә Казан шәһәре Думасы депутаты Надыйр Хәйруллин.

Шәһәр Думасының соңгы утырышында фестивальне Казанга күчерү идея­сен дә беренче булып ул күтәреп чыкты.

Дөрес, фестивальне үткәрү хокукы өчен Россия­нең тагын дүрт шәһәре: Сочи, Баку, Калининград һәм Кырым көрәшә. Ләкин Татарстан депутатлары фикеренчә, Казан алар арасында иң лаеклысы. «Яңа дулкын»ны Казанда уздыру максаты белән оештырылган махсус комитет Россия Президенты Владимир Путинга язган мөрәҗәгатенә халык имзасы җыя башлады. Моның өчен шәһәрнең 30 ноктасында (20 уку йорты бинасы, 10 сәүдә үзәге) имза җыю акцияләре оештырылачак. Шулай ук теләгән һәркем new-wave-kazan.ru сайтында музыкаль фестивальне Казанга күчерү өчен тавыш бирә ала. Әлеге акция декабрь уртасына кадәр барачак. Ә декабрь ахырында «Яңа дулкын»ның кайсы шәһәрдә узачагы билгеләнәчәк.

- Фестиваль Казаныбызга күчсә, бу шәһәрнең икътисади халәтенә, кече һәм олы эшмәкәрлек үсешенә яхшы тәэсир итәчәк. Даими эш урыннары да булдырылачак, - дип белдерде Татарстан Дәүләт Советы депутаты Николай Рыбушкин. - Фестиваль шулай ук шәһәрне тагын бер тапкыр дөньякүләм таныту, төрле төбәкләрдән, чит илләрдән туристлар җәлеп итү чарасы да.

Шәһәр мэры Илсур Метшин белдергәнчә, «Яңа дулкын» Россия йолдызларыннан кала Азия илләреннән дә катнашучыларны җәлеп итәчәк. Казан бит ул Европа белән Азия мәдәниятләре очрашкан урын да. Әлбәттә инде, үзебезнең татар рухын, татар мохитен дә онытмаячакбыз, диләр бәйгене Казанда оештыру инициаторлары.

Бүген Казан шәһәренең «Гаилә үзәге» янында волонтерлар, активистлар, «Яңа дулкын»ны Казанга күчерүне яклап, флешмоб оештырачак.

- Безнең яшьләр идея өчен генә дә эшләргә әзер булуларын Универ­сиада ярышларында дәлилләде инде. Хәзер без алар белән Казанны илебезнең җыр башкаласы ясар өчен көрәшәчәкбез, - дип белдерде оештыручылар.

«Рубин» - «Динамо» футбол ярышында «Рубин» җанатарлары трибуналарда «Яңа дулкын»+Казан=мәхәббәт» дигән баннер сузганнар иде.

^{Фото: business-gazeta.ru}