Җылылык җибәрелде: ә сезгә килеп җиттеме?

"Татмедиа" агентлыгында узган матбугат конференциясендә Татарстанның төзелеш, архитектура һәм торак-коммуналь хуҗалык министрының беренче урынбасары Алексей Фролов: "Шушы атнада һава температурасының 0 градуска төшүе көтелә", - дип моңсуландырды.

Ләкин, борчылырга сәбәп юк.
- Республикада йортларга һәм биналарга 14 сентябрьдән җылылык җибәрелде. Җылыту сезоны биш көн дәвамында + 8 градус торганда башлана. Теләче районы җылытуга 8 сентябрьдә үк кереште, - диде Алексей Фролов, - республикадагы өч мең 209 котельный да эш халәтендә. Татарстандагы 17 мең 26 торак йорт, 1639 мәктәп, 1865 балалар бакчасы, ике мең 183 сәламәтлек саклау учреждениесе җылылыкка тоташтырылды. Запас рәвештә 2060489,2 тонна мазут, дизель ягулыгы һәм 58 453 тонна ташкүмер әзерләп куелды.

Нормативлар буенча фатирда җылылык +18, ә почмак яктагы фатирларда +21 градустан ким булмаска тиеш. Торак милекчеләре гомуми җыелыш җыеп, җылылыкны күбрәк бирдерү турында карар кабул итә ала. Тик ул вакытта күбрәк түләргә дә туры киләчәк. Хәзер җылылык өчен түләү факттагы куллану күләменнән башкарыла. Татарстан халкының күбесе торак-коммуналь хезмәтләр өчен вакытында түли, исәп-хисап 98 процентка үтәлеп бара.

- Әмма, кайбер кешеләрнең вакытында түләмәүләре нәтиҗәсендә, коммуналь бурычлар биш миллиард 100 миллион сумга җитте. Коммуналь тармак оешмаларының газ өчен бурычлары быелның 1 октябренә 441,4 миллион, ә электр энергиясе өчен 33,0 миллион сум, - дип искәртте Алексей Фролов.

Казанда да җылылык белән тәэмин итүдә гадәттән тыш хәлләр юк.
- Башкалада дежур бригадалар 10 октябрьдә иртәнге 7.00 сәгатьтәге оператив хәбәрләшүдә, барысы да тәртиптә, дип белдерделәр. Яңа Савин районында "Элекон" заводы карамагында булган җылылык трассасын шәһәр челтәренә күчерү эшләре бара әле. Әмма завод тирәсендәге йортларга җылылык элеккеге трассадан бирү өзелмәде. Эшләр төгәлләнгәч, андагы йортлар яңа трассага ялганачак. Порт урамындагы күпфатирлы ике йорт бүгенгә кадәр җылылыкка тоташтырылмаган булган. Хәбәр керүгә үк чара күрелде, "Татфлот" җәмгыяте үзенең ведомство котельныен кабызды. Җылылык режимын көйләү октябрьдә тулысынча башкарылачак.

Алексей Фролов, әгәр җылылык килмәсә, хәбәр бирергә чакырды. Министрлыкның тәүлек дәвамында эшләүче "Кайнар элемтә" телефоны: (843) 231-14-10.
Казан шәһәре башкарма комитетының торак-коммуналь хуҗалык комитеты "Кайнар элемтә" телефоны: 292-21-02.

^{Фото: sntat.ru}