Товар алган кибет ябылса нишләргә?

Кибеттән товар сатып алган идек, кулланган вакытта аның кимчелекләре ачыкланды. Гарантиясе әле чыкмаган, тик товарны сатып алган кибет инде юк, ябылган. Бу очракта нишләргә була?

Марат Сафиуллин, Актаныш.

«Кулланучылар хокукларын яклау турында»гы закон нигезендә, кулланучы сатып алынган товарга карата сатучыга яки шул товарны җитештерүчегә канәгатьсезлеген белдерә ала. Законның 10нчы маддәсе, 12нче пункты буенча, товар белән бергә аның кайда җитештерелгәнлеге, фирмасы, импортеры - барысы да төгәл күрсәтелгән булырга тиеш. Әгәр товарны шәхси эшмәкәрдән сатып алгансыз икән, сәүдә ноктасы ябылса да, ул эшчәнлеген туктатса да, товарының сыйфаты өчен җавап бирә. Бу хакта «кулланучылар хокукларын яклау турында»гы законда искәртелгән. Юридик затларга килгәндә, ликвидацияләнеп, оешманың исеме үзгәртелгән очракта, шул кибетне кабул итеп алган яңа хуҗага мөрәҗәгать итәргә була. Гражданнар кодексының 58нче маддәсе нигезендә, оешмалар кушылганда элеккегесенең хокуклары, бурычлары яңа хуҗага күчә.
Оешма турында мәгълүматны аның ИНН, ОГРН документлары аша Федераль салым хезмәтенең рәсми сайтыннан белергә була. Яки оешма турында мәгълүмат сорап, юридик затларны бердәм теркәү оешмасына мөрәҗәгать итәргә мөмкин, дип аңлата Татарстан Дәүләт алкоголь инспекциясенең Казан территориаль органы хезмәткәрләре.