Безнең көч-кодрәт – халыклар бердәмлегендә

Татарстан – үз эченә бихисап халыклар туплаган, һәрберсенең туган теленә, мәдәниятенә олы хөрмәт һәм җылылык белән карарга омтылган төбәкләрнең берсе. Бездә татарлар, руслар, чувашлар, удмуртлар, украиннар, мордвалар, марыйлар һәм башкортлар кулга кул бирешеп, тату һәм бер-берсенә терәк булып тормыш итергә тырыша. Аларның бердәмлегендә –  көч вә көдрәт.

“Бүгенге көндә телләрнең яшәеше бик оптимистик хәлдә түгел, чөнки ике атнага бер тел югала. Шуңа күрә туган телне саклауга юнәлттерелгән теләсә кайсы проектлар, хезмәтләр зур игътибарга алынырга тиеш. Тел – ул балачактан ук безгә тапшырылган гореф-гадәтләр, мәдәният, тормышка карашлар. Төрле телләрне, бигрәк тә туган телеңне саклау мәсьәләсендә һәр кешенең үз өлеше булырга тиеш, “Ә мин нәрсә эшли алам?” дип ул үз-үзенә сорау бирә белсен иде” – дип Иҗтимагый палата рәисе Зилә Вәлиева чыгыш ясады. 

Шул идеяны студентлар үз чыгышларында күрсәтергә омтылдылар. Бигрәк тә сәхнәдә төрле халык вәкилләренең үзләренең туган телләрендә милләтләренә олы мәхәббәт белән шигырь сөйләүләре күңелгә үтеп керде. Чарада татар, рус, марый һәм башка халыкларның милли биюләре, җырлары яңгырады. Мондый искитмәле күренешне таң калмыйча күзәтү мөмкин түгел иде, билләхи. 

“2021 нче елны – Туган телләр һәм Халыклар бердәмлеге дип игълан итү Татарстан өчен генә түгел, ә чит төбәкләрдә яшәүче халкыбыз өчен дә бик мөһим. Татар дөньясы – чикле түгел. Җир шары буенча милләттәшләребез күпме генә чәчелгән булмасын, аларның карашы һәрвакыт Татарстанга, Казанга юнәлгән. Чөнки монда рухи көч, рухи байлык!” – дип Бөтендөнья татар конгрессы башкарма комитеты рәисе Данис Шакиров кунакларны бәйрәм белән котлады.

Быел Казан Дәүләт мәдәният институты Россия Федерациясенең башка югары уку йортлары арасында Идел буе район өлкәсенең халыкларын, мәдәниятен, сәнгатен өйрәнү буенча бердәнбер инновацион мәйданчыкка әверелде. Шулай ук грант отып, бердәнбер халыклар сәнгатен ясауга юнәлдерелгән инженерлык үзәге исемен үзенә алды. 

Туган телләр көне уңаеннан Дәүләт советы белән бер рәттән Мәдәният институты командасы җитәкчеләр өчен татар телен өйрәтү буенча проект булдырган. Нәтиҗәдә, ел дәвамында Татарстанның 43 районында сәхнәдә ачык чыгыш ясау буенча дәресләр алып барылачак.  

Айзилә Сабирова