Көектә янгын: 5 балалы гаилә урамда калган, ә күршеләре янып үлгән...

Ике гаилә сыенган таунхаус дип аталган зур гына ике катлы йорт була ул. Беренче булып күршеләре ягында төтен күтәрелә. Капка-коймаларны дөбердәткән тавышка гаилә башлыгы Марат Гатин уяна. Тәрәзәгә күз салса, ут телләренең шәүләсе биегәнне шәйләп ала. Урамга йөгереп чыкса...
– Янасыз, бит диләр. Халык та җыелырга өлгергән. Беренче эш итеп, күрше тәрәзәсенә барып өерелдек. Кагабыз, шакыйбыз, юк, ишетми. Үзе генә яши иде. Шуннан беренче каттагы тәрәзәсен ваттык. Кереп эзләдек тә әле, күзгә күренмәде. Икенче катта йоклаган булган, анда да менәсе идек, бөтен җирдә төтен, менә алмадык. Җитмәсә, түшәмнәре эреп тамарга кереште, төтен тамак төбенә утырып, сулый алмый башлагач, кире чыктык, – ди Марат. 

Менә шушы урында Марат, үз мал-мөлкәтен, гаиләсен коткарасы урынга, башта тизрәк күршесенә ярдәмгә ашыккан. Аңа инде ярдәм итеп булмаслыгын аңлагач кына, кем әйтмешли, өенә йөгереп кайткан.
– Эльвира балаларны уяткан иде, яшен тизлеге белән без аларны урамга чыгарып бастырдык. Алып булган, кулга эләккән кием-салымны алып чыгарга тырыштык. Андый чакта нәрсәгә барып ябышырга да белмисең, – ди әңгәмәдәшем.

Гатиннар 5 бала тәрбиялиләр. Олысына – 15, кечесенә 1 яшь. Аларны ул төнне икенче күршеләре сыендыра. Бүген исә гаилә апалары йортында.
– Янгын сүндерү машинасы чакыргач, 40 минуттан соң гына килде, гаепләмим, Питрәчтән кадәр килеп җитү өчен дә вакыт кирәк. Казанныкылар бәлки иртәрәк тә килеп басарга тиеш булганнардыр да, хәзер бу хакта сүз куертырга соң инде. Ләкин үз эшләренә җаваплы карадылар, бер-берсен алмаштырып, суны бертуктамыйча сиптерделәр. Безнең якны саклап калдылар, ләкин түбәләр яраксыз инде, икенче катта яшәрлек түгел. Беренче катка су тулды, бөтен көнкүреш җиһазлары, шкафлар, киемнәр су сиптергәнлектән сафтан чыкты, – ди Марат.

Үзе ул юрист булып эшли. Йортны ипотекага алганнар. Һәм менә бурычларын түләп бетермәстән, йортларының рәхәтен дә күрергә җитешмәстән, зур сынау кичерәләр. 
– Ике ел күченгән идек бу нигезгә. Күршебез исә яңарак кына килде. Чама белән илле яшьләреннән узган ир. Без аның белән исәнләшеп кенә йөрдек, артык аралашмадык. Кызганыч, аның гомерен саклап кала алмадылар, янып үлде... Урыны оҗмахта булсын инде. Янгынның ни сәбәпле килеп чыгуы әлегә билгесез, тикшерү нәтиҗәләрен көтәбез, – ди Марат Гатин.

Берничә көннән мәктәптә укулар башланачак. Гатиннар гаиләсенең дә 3 баласы мәктәп яшендә. Кызганыч, мәктәпкә дигән киемнәре дә, уку кирәк-яраклары да янып беткән. Ярдәм итәргә теләүчеләр өчен Маратның телефоны – 89534919000 (сбербанк). Тамчыдан күл җыела диләр, ярдәмебезне кызганмыйк әле.