«Күз курка, кул эшли»: бураннардан курыкмаган Шамил абый тарихы

Кар бураннары аның өчен авырлык тудырмый. Шамил абый Шәрәфиев 10 елдан артык ишегалды җыештыручы булып эшли. Аның турында торак-коммуналь хуҗалык җитәкчелеге алтын куллы оста да әле ул, диләр. 

Ишегалды җыештыру эшен ул 1978 елда ук башлап җибәргән була. Питрәч районының Күн авылыннан Казанга укырга килгән егет, өйдәгеләргә ярдәмем булсын, алардан акча алу егетлек эше түгел дип, ишегалды җыештыручы булып урнаша. Укый да, бер үк вакытта эшли дә. Армия сафларында хезмәт итеп кайткан егет Казан шәһәрендә автобус шоферы булып урнаша. 37 ел автобус йөртә. Шуның 10 елын шәһәрлар арасындагы марштрутларда эшләсә, 27 ел Казан шәһәре эчендә пассажирлар ташый. Лаеклы ялга чыкканнан соң, гомер буе эшләгән җиреннән китеп, ишегалды җыештыручысы булып урнаша. 

– 55 яшемдә лаеклы ялга чыктым, – ди Шамил абый. – Өйдә утырасы килмичә, эшләп караган хезмәт дип, ишегалды җыештырырга кердем. Бу хезмәтнең төп өстенлеге эш сәгате юк, кайчан телисең, шул вакытта эшкә чыгасың. Мин иртә белән башкарырга яратам. Буран көннәрендә, кеше эшкә барырга чыкканчы дип, ишегалдын көрәү өчен иртәнге биштә киләм. 

Шамил абый эшне җаны-тәне белән башкара торган кеше. Эшләгәнен күреп, ишегалдына трактор кергән вакытларда һәм көчле бураннарда йортта яшәүчеләр булышырга да чыга. Йорт территориясенә битараф булмаганнары өчен ул үзе дә халыкка рәхмәтле. Кеше физик хезмәт белән яшәргә тиеш, хәрәкәтләнеп яшәргә кирәк, дигән фикердә Шамил абый. 

– Ишегалды җыештыруның бер кыенлыгы да юк, – ди ун ел әлеге хезмәттә эшләүче Шамил абый Шәрәфиев. – Күз курка, кул эшли, дигәндәй, бу эшнең бер җаен белсәң, авырлыгын да күрмим. Бу эшемнән, рәхәтләнеп кар көрәүдән ләззәт алам. 

Шамил абый Казан бистәләренең берсендә үз йорты белән яши. Кайткач, үзенең шәхси йортын да кардан арындыра. Буранлы көннәрдә кар көрәп, кичке уннардан соң гына өенә керә. Тик ятарга яратмый ул. Аңа гел хәрәкәт кирәк. “Кыш айларын аеруча яратам, – ди Шамил абый. – Бу чорда саф һава, күкрәкләреңне киң итеп сулаудан да рәхәте юк”. Буран булса, ял көннәрендә дә, бәйрәмнәрдә дә эшкә чыга. “Бәйрәм, ял көннәре дип ятсаң, үзеңә тагын да авырлык тудырасың. Вакытында җыештырып барсаң, кыш көннәрендә эшләүнең бернинди авырлыгын тоймыйм. Вакытында эшлисең дә кайтып китәсең. Сине беркем дә эш сәгатең бетмәде, дип бәйләп тотмый, эшеңне генә эшлә”, – ди. 

Шамил абыйны иң борчыганы, үзләреннән соң бу эшкә алмаш булырмы, менә шуның өчен уйлана ул.  
– Бездән соң ишегалды җыештырырга кеше килерме, юкмы, менә шунысы иң зур проблемаларның берсе. Бу хезмәттә күбесенчә өлкән буын, лаеклы ялга чыгучылар эшли. Бер генә яшь кешенең дә ишегалды җыештырганын күргәнем юк. Юкса, без яшь чакта бу эштән куркып тормадык, эшләдек. Казанда ишегалды җыештыручыларга зур кытлык. Эш эзләүче студентлар өчен менә дигән эш бит, – ди ул. 

Совет районы идарә компаниясендә аның турында оста куллы кеше, нәрсәгә тотынса шуңа кулы ята, диләр. Үзеннән дә шул хакта сораган идек, үзебезнең микрорайонны тәртиптә тотабыз. Җәй көннәрендә төзекләндерү эшләрендә дә катнашабыз, эшебез шул, дип җавап бирде. 

Шамил абый белән сөйләшеп торган, Совет районының “Райжилуправление” коммуналь хуҗалык хезмәткәре Галия Мөхәммәтшина килде. “Шамил абый, сездән башка булмый, мәктәп янында люк капкасы астына кайсыдыр такта кыстырып калдырган. Әти-әниләр хафада, балалар өчен куркыныч түгел микән, дип борчылалар. Шуны сезнең белән барып карыйк әле, ишегалдында булсагыз ярар иде дип килдем”, – диде Галия Мөхәммәтшин.

– Сеңлем, китми булмый, эш көтә, вакытында карарга кирәк, – диде ул миңа. 
– Шамил абый бөтен эш тәртибен белә. Аның кебек кешеләр алтын бәһәсенә торырлык, – ди Галия. – Ничә ишегалдын узып монда килдем, мондый җаваплы эшләрдә ул безгә бик нык ярдәм итә. 
Шамил абыйны хезмәттәшләре дә, йортта яшәүчеләр дә хөрмәт итә. Укымышлы, дини кеше, диләр аның турында. Ислам кануннары белән яшәүче Шамил абый дини гыйлем дә үзләштерә, динебез кушканча, игелекле эшләр башкарырга да тырыша.