Юл өслегенә билгеләр татарча да язылачак

«Татар-информ» мәгълүмат агентлыгында узган матбугат конференциясендә моны Татарстан Республикасы буенча Эчке эшләр министрлыгының ЮХИДИ идарәсе җитәкчесе Ленар Габдрахманов хәбәр итте.

– Юлларга «Посмотри!» сүзе янына татарча «Игътибар!», «Сак бул!» кисәтүләре төшерү ниятләнелмиме? – дип сорау бирдем.

Әле соравымны биреп бетергәнче үк рус журналист хатын-кызы (исемен язып тормыйм инде) «Ужас!» – дип көрсенеп куйды.

– Бернинди дә «ужас» түгел, Татарстанда закон бар, рус һәм татар телләре – дәүләт телләре, – дип, каләмдәшемне уйлабрак сөйләшергә чакырдым.

Ленар Габдрахманов, шөкер, җанга ятышлы җавап бирде.

– Бу матур тәкъдим, без уйлашырбыз. Татарстандагы шәһәрләрдә һәм татарлар тупланып яшәгән район үзәкләрендә дә җәяүлеләр юл кичүләрендә асфальтка татарча да язулар төшерербез, – диде ул.

– Казанда башка бик күп милләтләр вәкилләре дә яши бит. Алайса, юлга аларның телендә дә язарга кирәк, – дип, һаман киресен сукалады әлеге журналист ханым

– Татарстанда рус һәм татар телләре – дәүләт телләре. Беренче чиратта без шушы законга таянабыз. Башка телләрдә дә язсак, юл кичүендә туктап, язуларны гына укып утырырга кала. Казанда тагын юл өслегенә инглиз телендә дә язып куеп була, – диде Ленар Габдрахманов.

Быелның дүрт аенда республикада 1109 юл-транспорт һәлакәте теркәлгән. Шуларда 74 кешенең гомере өзелгән, 1403 кеше төрле авырлыктагы имгәнүләргә дучар булган.

ЮХИДИ идарәсе җитәкчесе Ленар Габдрахманов юл-транспорт хәрәкәтендә кагыйдәләрне катгый үтәргә чакырды.