Үзең белмәсәң, башкага кирәкми

Быел Татарстанда Тел һәм милләтләр бердәмлеге елы булганлыктан, 15 февральдә башланачак парламент дәресләре дә шул теманы колачлаячак.

Шул уңайдан республиканың тарих, җәмгыять белеме, хокук һәм ана теле дәресләрен бирә торган укытучылар Татарстан Дәүләт Советы Рәисе Фәрит Мөхәммәтшин, тармак министры Илсур Һадиуллин белән очрашты.

Фәрит Мөхәммәтшин педагоглар белән сүзен балаларга тәрбия бирүдән башлады. “Безгә бу юнәлештә эшләргә дә эшләргә әле. Алар актив. Бигрәк та социаль челтәрләрдә. Бигрәк тә өлкән класслар. Әйе. Сез, беренче чиратта, белем бирергә тиеш. Әмма тәрбия эшен дә ныгытырга кирәк. Әти-әниләр белән дә эшләргә. Бөтен нәрсә ата-анадан килә. Үз баласына туган телен өйрәтмәсә, туган телендә үзе дә сөйләшмәсә, татар теле беркемгә дә кирәкми”, - дип белдерде Фәрит Мөхәммәтшин.

Аның фикеренчә, Бөек Ватан сугышы ветераннарын хөрмәтләү, Бөек Җиңү уңаеннан үткәрелгән чаралар, күп милләтле халыкларның гореф-гадәтләрен, йолаларын яшьләргә җиткерү  — болар барысы да тәрбия эше дип исәпләнә.

“Шул хөрмәт аша без милләтебезне, укучыларыбызны  тәрбиялибез”, - дип ассызыклады Парламент рәисе тәрбия темасына тукталып.

Фәрит Мөхәммәтшин тарихны да онытмаска, республиканың ничек, ни рәвешле барлыкка килүен яшь буынга җиткерергә кирәклеген, балаларны ватанпәрвәр итеп үстерергә кирәклеген дә искәртте.

“Парламент дәресләре, минем карашка, үсеп килә торган буын өчен сәяси социальләшү коралына әверелде. Без яшьләргә ахырына кадәр аңлатып җиткерә алмаган, күрсәтмәгән мәсьәләләр бар. Халыкара хәлләргә дә игътибар итегез. Сезнең максат — аларга фикерләрен җиткерергә өйрәтү, әлбәттә инде закон кысаларында”, - дип өндәде закон чыгару органын җитәкләүче очрашуга чакырылган укытучыларны. 

Лилия ЛОКМАНОВА