Бер этне тоту хөкүмәткә 150 сумга төшә

19 эт приюты эшли, шуларның 17се – шәхси һәм 2се – муниципаль. Моннан тыш Чаллы шәһәрендә муниципальара приют төзеләчәк, дип белдерде Татарстан Министрлар Кабинетының Баш ветеринария идарәсе башлыгы Алмаз Хисаметдинов Экология, табигатьтән файдалану, агросәнәгать һәм азык-төлек сәясәте комитетының күчмә утырышында.

2024 елга хуҗасыз этләрне тоту өчен республика бюджетыннан 88 миллион сум акча бүлеп биреләчәк, аның 29 миллионы агрессив этләрне тотуга юнәлдереләчәк. 

–    Приютларга карата безнең сораулар шактый. Бүген аны төзеп куеп, приютны тутырып куйсак, тагын төзисе була. Приют төзү, санитария кагыйдәләре һәм нормалары буенча, якынча 100 миллион сумга төшә. Аннан аларны тоту да кыйммәт. Дүрт-биш ел элек бер этне бер көн тоту 107 сум иде, хәзер 150 сум тирәседер. Моның өчен ел саен акча бүлеп бирәсе була. Шуңа күрә безгә хөкүмәт белән бергә аны үтәрлек карар кабул итәргә кирәк, – дип сөйләде Азат Хисаметдинов.

Спикер искәртеп үткәнчә, 2024 елның 1 мартыннан Татарстан Министрлар Кабинетының йорт хайваннарын тотуга, аларны урамда йөртүгә карата өстәмә таләпләрне раслау турындагы карары гамәлгә керә. Аның нигезендә йорттан (фатирдан) читтә, кешеләр арасында булганда, автобуста барганда этнең муенчагы кидерелгән булырга һәм ул 1,5 метрлы тезгендә тотылырга тиеш; этне урамга үзен генә чыгарырга ярамый.

Шулай ук йорт хайванын тоту өчен, аның хуҗасы күпфатирлы йорт яки арендага бирелә торган торак милекчеләренең ризалыгын язма рәвештә алырга тиеш була. Күпфатирлы йортларның гомуми кулланылыштагы урыннарында һәм йорт яны территорияләрендә йорт хайваннарын тоту тыела. 

–    Әлеге таләпләр үтәлсен өчен, административ җаваплылык кертү вариантлары карала, – дип ассызыклап үтте докладчы.
Этләрне вакцинацияләү мәсьәләсенә дә тукталды. Хәзерге вакытта республикада 110 меңгә якын эт вакцинацияләнгән. Аларны теркәү буенча эш алып барыла. 2017 елдан башлап 14 меңгә якын эт теркәлгән. Әлеге хезмәт электрон рәвешкә күчерелеп, дәүләт хезмәтләре сайтында урнаштырылган.

Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев хуҗасыз этләр белән бәйле мәсьәләнең авыр булуын, шул ук вакытта аны якындагы елда хәл итәргә кирәклеген ассызыклады. Хуҗасыз этләрне теркәү мәҗбүри куелмаса, аларның саны артачак, диде ул.