- Ата-аналар мондый ялганга ышанмасыннар, улларының язмышы белән уйнамасыннар иде. Армия генә чын хәрби билет бирә,- дип кисәтте Татарстан Республикасы хәрби комиссары Сергей Погодин бүген "Татмедиа" агентлыгында узган матбугат конференциясендә.

Россиядә 1 октябрьдән башлап 31 декабрьгә кадәр армиягә көзге чакырылыш компаниясе бара. Чакырылыштагы хәрби хезмәт срогы - бер ел. Татарстаннан 18 яшьтән 27 яшькә кадәрге дүрт меңнән артык ир-егет хәрби частьләргә җибәреләчәк.

- Республика 40 хәрби часть белән шефлык элемтәләрендә тора. Язгы якта ике мең иде, ә бу чакырылыштан янә 2300 егет шушы частьләргә җибәреләчәк. Менделеевск, Әлмәт, Чистай, Югары Ослан, Түбән Кама, Бөгелмә, Биектау, Зәй районнары вәкилләре хәрби частьләргә бардылар. Саба белән Теләче районнары җәмәгатьчелеге шефлыктагы хәрби частькә җәй дәвамында ике мәртәбә барып кайттылар, хәтта. Габдулла Кариев исемендәге театр артистлары хәрби частьләрдә "Отчий дом" спектаклен инде егерме тапкыр куйдылар. Артистларыбызны һәр хәрби частьтә бик җылы кабул итәләр, мондый гастрольләр алга таба да оештырылачак, - диде генерал-майор Погодин.
Хәрби хезмәткә китүче ир-егетләргә, Татарстан хөкүмәте исеменнән, кәрәзле телефон, көнкүреш кирәк-яраклары тутырылган биштәр, банк картасы бүләк ителә. Кәрәзле телефоннан аена утыз минут сөйләшү һәм ун SMS җибәрү бушлай. Банк картасына ай саен солдатларга - ике мең сум, ә ятимнәргә өч мең сум акча күчерелә.

- Татарстан егетләре арасында десант, диңгез пехотасы гаскәрләре аеруча популяр. Хәзер фәнни роталар, спорт роталары да туплана башлады. Кызлар арасыннан да армиягә барырга теләк белдерүчеләр саны артуы күзәтелә. Язгы чакырылышта 44 кыз хәрби хезмәткә китте. Армиягә ике-өч елга контракт төзеп тә барырга була. Әгәр кем дә булса, дини карашлардан чыгып армиягә барырга теләмәсә, ул альтернатив гражданлык хезмәтен сайлый ала. Альтернатив хезмәт срогы - 21 ай. Татарстанлылар кайсы гына хәрби частьтә дә тырышып хезмәт итәләр. Командирлардан мактау хатлары килүе күңелле. Балаларын ватанпәрвәрләр итеп тәрбияләп үстергәннәре өчен ата-аналарга, укытучыларга зур рәхмәт!-диде Сергей Погодин.

- Борчулы шалтыратулар юк. Быел 29 мөрәҗәгать алынды, аларның да күбесе белешмә рәвешендәгеләр",- дип тынычландырды Казан гарнизоны хәрби прокуроры Андрей Сысолятин.

Куен дәфтәренә
Казан гарнизоны хәрби прокуратурасының "кайнар элемтә" номеры (843) 264-23-51. Эш көннәрендә 9.00-18.00 сәгатьләрдә гамәлдә.

Татарстан Республикасы Хәрби комиссариатының "кайнар элемтә" номеры (843) 221-60-06. Эш көннәрендә 9.00-18.00 сәгатьләрдә шалтыратулар кабул итә.
Республика Хәрби комиссариатының тәүлек дәвамында эшләүче кыска "кайнар элемтә" номеры: 05216.

Охшаш язма: Армиядән качу "актуальлеген" югалткан

^{Фото: army-news.ru}