Ничек итеп ике мең урынына дүрт мең алырга?

- Федераль законнар чыгаруда үзгәрешләр кертелеп, пенсияне финанслау буенча дәүләт программасында катнашуга кагылышлы
яңалыклар барлыкка килде. Әлеге программа быелның 31 декабренә кадәр озайтылды. Барлык шартлар да моңа кадәр программага
кергәннәргә кагылмый, - ди Роза ханым.

- Программа турында тулырак аңлатыгыз әле?
- Кеше теркәлү урыны буенча пенсия бүлегенә барып, гариза язарга тиеш. Ул Пенсия фондына ел дәвамында кимендә ике мең сум акча күчерсә, аны, пенсиягә чыккач, икеләтә арттырып, ягъни дүрт мең иттереп алачак.

- Бу программа хәзер пенсиядә булганнарга кагылмыймы?
- Пенсия яшенә җитмәгәннәр генә 2014 елның 31 декабренә кадәр беренчел кертемне салып өлгерергә тиеш. Ә электән үк программада катнашучыларга, кертемнәрен дәвам итәргә телиләр икән (2008 елның 1 октябреннән 2013 елның 31 сентябренә кадәр программага кергәннәр), 26 декабрьгә кадәр ашыгырга кирәк.

- Роза ханым, кайберәүләр бу ике меңне ел дәвамында ай саен кертеп барырга кирәк дип аңлый.
- Юк. Ел дәвамында 12 меңгә кадәр акча кертергә була. Аны бер тапкыр да, ел дәвамында өлешләп кертсәң дә ярый. Күпме телиләр, шуның кадәр кертәләр. Бары иң кимендә - 2 мең, иң күбе 12 мең икәнен генә исләреннән чыгармасыннар. Пенсиягә чыккач, гариза язып шул акчаларны икеләтә кайтарып алалар.

- Димәк, иң күбе 12 мең генә. 50 мең кертеп, 100 мең кайтарып булмый?
- Юк-юк. Дәүләт иң күбе 24 мең, ягъни кертергә мөмкин булган иң максималь сумма - 12 меңне генә икеләтә арттырып кайтара. Тагын шунысы да бар: яңа кануннар нигезендә, киләсе елдан акчаларны бары биш елга бер генә тапкыр кайтарып булачак.

- Ә кеше пенсия яшенә җитә алмаса?
- Акча мирас буларак туганнарына, балаларына, оныкларына күчә.

Татарстан буенча Пенсия фонды бүлеге җитәкчесе Марсель Имамов:
- Бүген пенсияне финанслау дәүләт программасында Татарстаннан 580 меңнән артык кеше катнаша. Программа эшли башлаганнан бирле татарстанлылар үзләренең булачак Пенсия фондына 1,5 миллиард сум акча керткәннәр, дәүләт исә шуны 214, 2 мең кешегә 1, 2 миллиард сум күләмендә кайтарып бирде.
Татарстан буенча Россия Пенсия фонды бүлегенең кайнар элемтә телефоны: 8 (843) 279-27-27