Олег Фазылҗанов: «Мин үзебезнең Балык Бистәсендә сайлыйм»

Сез сайлауга барасызмы? Нәрсә өчен сайлыйсыз?

Зөлфирә Зарипова, Татарстанның халык артисты:

- Мин Вахитов районындагы сайлау участогында сайлыйм. Сайлау булган саен барам. Без бит намуслы булып үскән буын. Иң мөһиме: тормышыбыз начар гына булмасын. Бөтен депутатлар бердәм булып, халык өчен эшләсеннәр иде.

Мәсгут Имашев, Татарстанның атказанган сәнгать эшлеклесе, Россиянең атказанган мәдәният хезмәткәре:

- 85 яшемә кадәр бер генә сайлауны да калдырганым булмады. Бу юлы да барачакмын. Депутатлар сессияләрдә бәхәсләшсеннәр. Илдә тынычлык кына булсын. Киләчәк буынга да имин тормыш телим.

Ләлә Миңнуллина, Татарстанның халык артисты:

- Минем сайлау участогы Идел буе районына керә. Сайлау көнне өйдә ятып булмый бит инде. Мин анда үз гражданлык бурычымны үтәргә, үз сүземне әйтергә барам.

Олег Фазылҗанов, Татарстанның атказанган артисты:

- Мин үзебезнең Балык Бистәсе районының Чаллы авылында сайлыйм. Илебездә иминлек булсын. Халык мәнфәгатьләрен кайгырта торган депутатлар килсен. Башка илләр белән тату, дус мөнәсәбәттә булырга язсын.