Россия Президенты гранты иясе Яна Мөхәмәтшина: «Тәнкыйтьне кабул итә беләсең икән, син һичшиксез уңышка ирешәчәксең»

Яна арка миен, аның белән бәйле төрле җәрәхәтләрне, авыруларны өйрәнә. Грант - аның ун еллык хезмәт нәтиҗәсе.
- Студент елларыннан бирле мин үзәк нерв системасында нерв күзәнәкләренең үлемен тикшерәм. Авырулардан, җәрәхәттән соң нерв тукымаларын тергезү ысулларын эзлим. Грант бу өлкәдәге фәнни эшебезне дәвам итү өчен реактивлар (препаратлар) сатып алырга, проектта катнашкан кешеләргә хезмәт хакы түләргә тотылачак, - ди Яна.

Яшь галимә сүзләренчә, хәзер уңышка ирешәсе килгән кеше өчен барлык шартлар да тудырылган.
- Нинди генә эшкә тотынма, ул эштә уңышка ирешеп була. Барысы да яшь белгечнең үзеннән тора. Әгәр дә син үз эшеңне яратып башкарасың, бер урында гына утырмыйсың, тәнкыйтьне кабул итә беләсең икән, син һичшиксез уңышка ирешәчәксең. Дәүләт тә яңа башлангычларны хуп­лый, шул ук грантларны гына алыйк. Дәүләт галимнәрне, фәнне гел шулай күтәреп торса, без кимендә ун ел эчендә дөньяның иң алга киткән дәүләтенә әйләнәчәкбез. Димәк, ­Россия­ фәненең киләчәге бар әле, - ди яшь галим.

Әлеге грант 2009 елдан бирле ­Россия Президенты указы белән тапшырыла. Ел саен «Математика һәм механика», «Физика һәм астрономия», «Химия, яңа материаллар һәм химик технологияләр», «Биология һәм тормыш турында фән», «Җирне өйрәнү, экология һәм табигый байлыкларны рациональ куллану», «Иҗтимагый һәм гуманитар фәннәр», «Медицина», «Техник һәм инженер фәннәре», «Мәгълүмати-телекоммуникацион системалар һәм технологияләр», «Авыл хуҗалыгы фәннәре» кебек ун төрле юнәлештә эшләүче галимнәрне билгеләп узалар.

Фән белгечләренә ел саен 600 мең һәм бер миллионлык грантлар бирелә. Чара «МедХим Россия» медицина химиясе буенча өченче Россия конференциясе кысаларында узды.