«Тәүге мәртәбә катнашачакмын, шунлыктан, дулкынландыра»

Алинә Гәрәева, студент:
- Сайлауларда тәүге мәртәбә катнашачакмын, шунлыктан, дулкынландыра. Үземә ниндидер җаваплылык өстәлә кебек. Инженер белгечлегенә укыйм. Юдино бистәсенә илтүче юлда, ягъни Урман аръягы бистәсендә юл-транспорт чишелеше төзесеннәр иде. Анда Юдинога борылыш бик хәвефле. Мин үткән саен күңелдән юл чишелешенең сызымнарын да сызам. Ләкин бу корылма минем кодрәтемнән генә килә торган эш түгел шул. Депутатлар шушы мәсьәләне игътибарга алсыннар иде.

Алексей Сазонов, инженер:

- Казанның Совет районында туып-­үстем, шушында югары белем алдым. Хезмәт юлым республика белән бәйле: шәһәрләрдә һәм районнарда электр челтәрләрендә эшлибез. Казанда узган Универсиада шәһәрнең алгарышына зур файда итте. Олимпия уеннарын да үзебезгә алырга кирәк. Мин дә, гаиләбез дә сайлауларда һәрвакыт катнашып киләбез. Депутатлар пенсияләрне күтәрү, башка социаль мәсьәләләрне уңай чишү турында кайгыртсыннар иде. Милләтара, динара дуслык булсын. Россия Дәүләт Думасына сайлауларга мин шушы теләкләр белән барам.

Миләүшә Гаделшина, күпбалалы ана:

- Сайлауларга бару һәркемнең гражданлык бурычы дип саныйм. Шуңа да гаиләбез белән сайлауларга барачакбыз. Өч кызыбыз: Зәмирә, Әмилә, Сәфияне тәрбиялибез. Аларның якты киләчәге, республикадагы сыйфатлы тормыш безнең тавышка бәйле бит. Дәүләт Думасына безнең Татарстан командасы депутатлары күбрәк сайланса, безнең гозерләребезне федераль дәрәҗәдә ишетәчәкләр дигән ышаныч бар. Моның өчен без, бердәм булып, сайлауларга барырга тиешбез.

Алия Сабирова, аш-су остасы:

- Әлбәттә, сай­лау­лар­га барачакмын. Татарстанда яшәгән һәркем моны эшләргә тиеш дип саныйм. Сайлау көненең бәйрәм рухында узуы да мөһим. Үз тавышымны биргәннән соң, «Казан Арена» каршында булачак бәйрәмгә барырга да исәплим. Бергәләп тавыш бирик, бергәләп бәйрәм итик!