“Уктан ату – күңел ачуның иң хәерле төре”

Белгәнегезчә, халыкара “Туган батыр” проекты татар батыры образын популярлаштыру максатында эшли торган яңа проект. Әлеге проектка нигез салучы, “Туган авылым” милли-туристлык комплексын гамәлгә куючы Радик Абдрахманов сүзләренчә, проект берничә юнәлешне берләштерә.

–    Без аның ярдәмендә балаларга милли традицияләребезне җиткерү, тарихыбызны, культурбызаны популярлаштыру максатын куйдык. Хәзерге  вакытта “Туган батыр” аннимацион сериалы төшерелә. Зур экраннарга ул 2024 елның ахырында чыгачак. Җәядән ату турниры да Туган батыр образын популярлаштырырга ярдәм итәр дип уйлыйбыз. Гомумән алганда, Төркиядә, Казахстанда, Башкортстанда күчмә халыкларның уеннары зур масштабта оештырыла. Киләчәктә бездә дә шул дәрәҗәдә узар дигән өмет бар, – дип сөйләде журналистларга Радик Абдрахманов.

Турнир узган ел да Алабугада узган. Чарага илнең төрле төбәкләреннән укчылар килгән, алар барысы да милли киемнәреннән чыгыш ясаган. 
Алабуга районы имам-мөхтәсибе Хәлим хәзрәт Шәмсетдинов турнир оештырыла башлауның тарихына тукталып, башта йөгерү, аннары уктан ату ярышлары узуын билгеләп үтте. 

–    Пәйгамбәребез Мөхәммәд салләллаһу галәйһи вә сәлләм үзенең хәдисендә, балаларыгызны уктан атарга, йөзәргә һәм атта йөрергә өйрәтегез, дигән. Шулай ук уктан ату – күңел ачуның иң хәерле төре, дип әйтеп калдырган. 2021 елда мөхтәсибәт каршында уктан ату дәресләре оештырылды. 2022 елда  Идел буе Болгар дәүләтендә исламны кабул итүнең 1100 еллыгы уңаеннан Россиякүләм традицион җәядән ату турнирын үткәрү идеясен республика мөфтие Камил хәзрәт Сәмигуллинга җиткергәч, ул “Туган батыр” проекты белән берләшергә киңәш итте. Соңрак Радик Абдрахманов белән сөйләшкәч, фестивальне “Туган батыр” дип атарга булдык, – дип сөйләде ул журналистларга.  

Узган ел фестивальдә илнең ун төбәгеннән 65 кеше катнашкан. Хатын-кызлар һәм балалар өчен дә аерым номинацияләр каралган. Быелгы фестивальнең приз фонды – 200 мең. Җиңүчегә 40 мең бирелә. Иң яшь катнашучыга исә планшет бүләк итәчәкләр. Фестивальдә катнашуның төп шарты – тарихи костюм кияргә. Оештыручылар турнирда иң матур костюм номинациясен дә булдырган.

Фото: https://vk.com/kstelb