Дилүзә Хәбиева: «Нәселебез – кечкенә генә күпмилләтле республика» (ФОТО)

- Милли бәйрәмнәр ва­кытында бер-беребезне котлыйбыз. Бергә җыелганда, төрле милләт җырларын җырлыйбыз, биюләрен биибез. Бер-беребезгә кунакка баргач, берәр тәмле милли ризык пешерүне махсус сорыйбыз. Бәлеш, токмачлы аш - бөтен гаи­ләбез, туган-тумачаларыбызның яраткан ризыгы. Читтәгеләр безгә кунакка кайт­кач, татар ризыкларының рецептларын алып китә. Аллага шөкер, үзара бик дус-тату яшибез. Конкурс-бәйгеләрдә актив катнашабыз. Бәйгеләр кайсы гына шәһәрдә узса да, туганнар янәшәбездә булырга тырыша. Пермьдә узган конкурска барысы егерме бер кеше бардык. Мәскәү, Уфадагы туганнар да ара ерак дип тормады, безгә җан атарга килде. Күптән ­түгел генә энемнең баласы туды. Бәби ашына ­Россиядә яшәүче бөтен туганнар җыелды. Гаиләләр арасында дингә, милләткә кагылышлы аңлашылмаучанлык­ларның чык­каны юк. Бер-беребезгә хөрмәт белән карыйбыз. Балаларыбыз да олылар үрнәгендә тәрбияләнә. Балалар дигәннән, катнаш гаиләләрдәге балаларга Даниэль, Эдуард кебек интернациональ исем бирергә тырышалар. Безнекеләр дә искәрмә түгел, - ди Дилүзә.

Дилүзә белән иренмичә, нәселләрендә күпме милләт кешесе булуын исәпләдек. Барысы ун милләт килеп чыкты.