Алмаз Миргаязов: «Бу темага минем дә күптән язасым килә иде»

Бу темага минем дә күптән язасым килә иде...
Маратның һәр сүзенә 21 еллык тәмәкече стажым белән пичәт сугам. Тик "тартуны ташлагач, кешенең организмы никотин таләп итеп бәргәләнә башлый" ише җөмләләр белән кеше куркытуына гына шикаятем бар.

Организмда никотин балансы өчен барган эчке көрәшне тәмәке ташлаган кеше ХӘТТА СИЗМИ ДӘ!
Тәмәке ташлау ломкаларының төп сәбәбе - АКЫЛДА, БАШТА. Ташларга уйлап та, "никотин газабы"ннан курыккан кешеләргә гади генә сорауларга: "ни өчен төнгә кергәндә тәмәкече калтыранып кесәсен капшый, тәмәкесез калса, пленга эләккәндәй тыпырчына, йоклап китә алмый, кибеткә чыгып йөгерә, ә тәмәке алып кайтып куюга, иртәнге 10га хәтле гырылдап йокыга тала - никотин газабы ярты сәгать саен "типкәләп" уятмый?" дигән сорауга җавап биреп карарга киңәш итәм.

Нәтиҗә - әгәр син никотин ачлыгын йоклаганда сизмисең икән, нинди "газап", нинди "бәргәләнү" булсын инде ул!? Димәк, ул "газап" сизелмәслек дәрәҗәдә нәни...

Киңәш - тартуны ташларга җыендыгыз икән, ниятегезнең катгый булуына инаныгыз. Юкса, бер ташлап-башлап, психологиягез өчен ул хәшәрәтнең никадәр "кадерле" булуы турында иллюзиягезне генә баетачаксыз.

Тәмәкегә киткән акча, сәламәтлек, нервы (Кызык, әмма, үзе үк "тынычландыра" торган "нервы"ны тәмәке үзе үк какшаткан булуын, хәтта шуның белән генә "пленга" алуын аңлау - минем өчен чып-чын ачыш булды!!!) турында фикер йөртә башласагыз, тагын да күбрәк тарта башлаячаксыз.
Чөнки бу уйлар - стресс, ә тәмәкече өчен стресс - ул нәрсә? Дөрес - тагын тәмәке! Күбрәк уйлаган саен - күбрәк тартасың...))

Тәмәке ташлауның ЧЫН теләгенә керү белән - просто туктагыз! "Соңгысын гына тартыйм, гомерлеккә хушлашам бит..." ише көфер уйлар белән үзегезне юксыну газабына этәрмәгез! Туктагыз да тәмәкесез яшәүнең никадәр рәхәт булуын, моңа кадәр никадәр җүләр булуыгыз турында минут саен белеп, эчке тыныч рәхәтлек тоеп, яши башлагыз - ташлагыз!
Үзегезнең, сезгә карап, гаиләгез, туганнарыгыз, якыннарыгызның соклануын күреп җаныгызга рәхәт алыгыз. Бүгеннән башлап, сезнең авыздан сасы тәмәке исе килмәячәк, тартып бүлмәгә кергәч сезгә беръюлы 15 кеше борынын җыерып карамаячак. Җәмәгать урыннарында, кунакта, ашта, концертта... сез "кайчан бетә инде бу?" соравы белән арлы-бирле бөгәрләнмисез... Кыскасы, тәмәке тартмау - газап түгел, ә бәхет, абруй, сөенеч!

Өч елдан артык буе шушы дәрәҗәләргә күмелеп яшәүче - мин!
Вәт!