«Кырыс» статистика: 20 әбигә бер бабай туры килә

Озын гомер юлы үтеп тә, күзләрендә яшәү очкыны сүнмәгән бу ак әбиләрнең бик күбесе безнең укучыларыбыз, туган телебез сагында торучылар. Без аларны бик яратабыз. Ләкин бу фоторәсем өлкән яшьтәге ир-атларның эчен пошырыр дип башыбызга да килмәгән иде ул чакта. Бер укучыбыз һәм даими авторыбыз: «Берәр бабайны да төшерәләр инде аны», - дип, үзенең үпкәсен редакциябезгә килеп белдерде хәтта. Бер караганда, ул да хаклы. Ләкин икенче караганда, бабайларны көндез чыра яндырып эзләсәң дә, табуы авыр бүгенге көндә. Әнә статистика да шулай ди. 20 әбигә бер бабай гына туры килә икән. Ир-атлар, нишләптер, бу дөнья белән алыш-бирешләрен тизрәк ясыйлар да, тизрәк китәргә ашыгалар шул. Бик кызганыч! Озак яшәгез әле, бабайлар! Сез дә безгә бик кирәк! Без сезне дә бик яратабыз!