Үз районыңа кагылышлы яңалыклар, концертлар, китаплар белән танышып барырга тырышасың бит инде ул. Әнием ягыннан нәсел чылбыры барып тоташкан Куян авылы тарихын үз эченә сыйдырган "Агыйделнең Куяны" китабы белән дә шулай булды...
Төзүчесе Гөлүсә Закировага да язу сырладым - мина зинһар, берсен калдыр, дип. Районда зурлап тәкъдир итү чарасы турында да ишетеп белдек... Әмма бу китап минем өчен нинди зур сюрприз әзерләгәнен күз алдыма да китермәдем.
Укып чыгарга өлгермәдем, композитор Илгиз абый Закиров шалтыратты.
Күрденме, янәсе, безнен унбиш елдан артык авылыбыз гимны булган "Аешым" шигырен "Куяным" иткәннәр? Шаяртудыр дигән идем - юк икән. Унбиш елдан артык (язылуына 20 ел бар да бар!) бер авыл Сабан туе да ансыз узмаган, минем китапларыма, данлыклы Илгиз Закиров кассета-дискларына кергән уртак иҗат җимешебез Куян авылы шигыренә әверелгән дә куйган!
Авторы - Айгөл Шәехова. Һәм иң кызыгы - шигырьдә Аеш урынына Куян дигән генә үзгәреш кертелгән, калган өтеренә кадәр - минеке... Вәт мин әйтәм: җиттек шундый заманга - урам уртасында кычкыртып талыйлар! Ә... минем шигырьне Куян авылына "шапылдаткан" Айгөл Шәехова-Шакирова сүзен "туган авылым табигатенә сокланып мәктәп елларында язылган шигырем" дип башлаган иде дә, шигырьнең авторы мин булуын аңлауга бу "иҗат жимеше"нең каян килеп чыгуын шундук "белми" дә башлады. Янәсе, мәктәп иншалары арасыннан табылган, кемдер буталган, минем жәмгысы 6-7 генә шигырем бар, алары да бер кая да басылмаган иде, диде.
Икенче көнне миңа шалтыратучы әнисе Роза ханым да (Куян авылы клуб мөдире дип аңладым) шул ук сүзләрне кабатлады: "Айгөлнең иҗаты 6-7 шигырь генә иде инде ул, иншада кулланган, күрәсең..." Тел шартлатырлык та инде: жәмгысы 6-7 шигырең булгач, аның сигезенчесе үзеңнеке түгел икәнен белмичә була? Кайчаннан бирле, инша эчендә дүртәр куплет шигырь кулланыла да аның авторын җәя эчендә күрсәтеп тә торышлы түгел?! Китапны төзүче журналист Гөлүсә Закирова шигырьне авыл тарихы альбомыннан алынуын, шигырьнең саргаеп беткән кәгазьдә саклануын, авторы Айгөл Шәехова булуын раслап әйтте...
Мин ихлас, әлеге бик тә күңелсез караклык тарихында үзләренең башлап ачыклык кертүләрен, район газетасына опровержение бирүләрен көткән идем. Район хастаханәсендә эшләүче, яшьти Айгол Шәехова-Шакировадан андый адым булмагач, үземә алынырга туры килде. Шигырь ул, безнен өстебезгә кигән күлмәк, яшәгән өебез төсле үк - милек. Интеллектуаль милек. Һәм берәүнең дә аны урлап, апылдатып-шапылдатып, үз милкенә "әйләндереп", кабат ташка басарга хокукы юк! 500 данәдә басылган "Агыйдел Куяны"ның әнә шундый караклык белән дөньяга чыгуы бик күңелсез. Ә каракның аның, үзегез беләсез, бүреге яна...
Иң мөһим һәм кызыклы язмаларны Татмедиа Telegram-каналында укыгыз
