Казан Яшьләр көнен экстремаль рәвештә каршыларга җыена. Яшьләр көне шәһәр кешеләре һәм кунакларына заманча урам мәдәнияте фестивале буларак тәкъдим ителәчәк.
27 июнь бөтен Россия күләмендә Яшьләр көне буларак билгеләп үтелә. Татарстанда бу вакыйгага чын мәгънәсендә яшьләрчә якын килергә булганнар. Фестиваль Бондаренко урамындагы «Ватан» спорт комплексы биләмәсендә урнашкан скейт-паркында уза. Бәйрәм ике мәйданчыкта гөрләячәк. Беренчесе янына тартылучыларның кайберләренә тел асларына тынычландыргыч дару төймәләре салу да комачауламас. Ник дигәндә, спортның экстремаль төрләре белән шөгыльләнүчеләрне карап торганда да башлар әйләнә бит анда! Икенче мәйданчыкта заманча рәсем сәнгате, музыка һәм бию яратучыларны көтеп калалар. Татарстанның барлык почмакларыннан, шулай ук Россиянең төрле төбәкләреннән җыелган яшьләр арасында уздырылган ярышларда җиңүчеләрне дипломнар һәм кыйммәтле бүләкләр көтә. Төп ярышлардан тыш бәйрәмдә иң-иңнәрнең паркур һәм стант райдинг буенча күрсәтмә чыгышларын да карап хозурлана аласыз.
Иң мөһим һәм кызыклы язмаларны Татмедиа Telegram-каналында укыгыз
