Әти-әниләр:”Каравыл!”, ә балалар:”Ура!” кычкыра

Татарстанда ел башыннан балалар катнашында 41 юл-транспорт һәлакәте теркәлгән, 42 бала төрле авырлыкта имгәнүләр алган, үлүчеләр юк.

Кагыйдә белгән – исән калган

–Мәктәпләрдә язгы каникул башланды. Кызганыч, андый вакытта балалар катнашындагы аварияләр саны артып китүчән. Әти-әниләр, өлкәннәр каникул көннәрендә балаларга юл хәрәкәте кагыйдәләрен искә төшерсеннәр иде. “Йорт – мәктәп – йорт” сәяхәте оештырып, укучы балага иң имин юлны билгеләргә кирәк. Шунда кагыйдәләрне дә өйрәтә барасың, – дип киңәш бирде Татарстан буенча Эчке эшләр министрлыгының Дәүләт автомобиль инспекциясе идарәсе җитәкчесе вазифасын вакытлыча башкаручы Айрат Сәмигуллин.

Киемнәргә, сумкаларга яктылык кайтара торган тасмалар һәм тамгалар беркетү отышлы. Караңгы вакытта әлеге элементлар кешене ерактан ук күреп алырга ярдәм итә. Җәяүле балалар катнашындагы аварияләрдә 18 малай һәм кыз имгәнүләргә дучар булган.

– Кечкенә балаларны автомобильдә махсус урындыкларга утыртып йөртү кирәк. Әлеге урындык автоинспектор өчен түгел, ә сабый иминлеге өчен зарур. Машина каршылыкка килеп бәрелгән очракта, бер генә кеше дә кулындагы сабыйны тотып калып өлгерә алмый. Махсус урындык автомобиль маңгае белән яки яннан бәрелгән очракларда баланың иминлеген 70 процентка кадәр күтәрә, – диде Айрат Сәмигуллин.

Мотоцикл кечкенә – хәсрәте зур

Язның иртә килүе бер яктан караганда, күңелле күренеш. Тик, бу хәл автоинспекция хезмәткәрләрен борчуга сала.

– Питбайкларда, квадроциклларда автомобиль юлында йөрергә рөхсәт ителми. Мондый транспорт чаралары кечкенә балалар өчен бик хәвефле. Узган ел Лаешта 10 яшьлек малай квадроцикл йөрткәндә бәрелеп үлде, янында утырып барган 13 яшьлек абыйсы имгәнде. Ата-аналар мондый фаҗигале хәлләрдән сабак алсыннар иде. Кечкенә балаларга мотоцикллар бүләк итүнең ахыры үкенечле тәмамланырга мөмкин, – дип кисәтте Айрат Сәмигуллин.