Бәлештә – җимешнең, бюджетта акчаның күп булуы яхшы

Бездән алда: Мәскәү, Мәскәү өлкәсе һәм Санкт-Петербург. Идел буе федераль округы яссылыгында караганда, Татарстан беренче.

Салымнар кереме файдасы

– Быелның гыйнвар аенда Татарстанның берләштерелгән бюджетына салым һәм салым булмаган керемнәр 28,7 миллиард сумны тәшкил итте. Бу акчаларның 24,5 миллиард сумы – республика бюджетына, ә 4,2 миллиард сумы җирле бюджетларга керде. Узган елның гыйнвары белән чагыштырганда керемнәр 25 процентка артты. Үсешкә салым булмаган керемнәрнең һәм физик затларга салымнарның артуы тәэсир итте, – диде республиканың финанс министры урынбасары Алла Анфимова “Татар-информ” мәгълүмат агентлыгында үткәрелгән матбугат конференциясендә.

Чыгымнар күбрәк булачак

Татарстанның берләштерелгән бюджетының гыйнвар аендагы чыгымнары 33,8 миллиард сумны тәшкил иткән.

– Быел республика бюджетының еллык керемнәре 472 миллиард сумнан күбрәк булыр, дип фаразланыла. Чыгымнар 485,6 миллиард сумга җитәр, дип исәпләнелә, – диде республиканың финанс министры урынбасары Гела Герасимова.

Үзара салым дәвам итә

Авыл халкы ирекле рәвештә акча җыешып, җирле юлларны, чишмәләрне төзекләндерүдә катнаша. “Шәһри Казан” газетасы журналисты соравына  Гела Герасимова:”Гражданнарның үзара салым башлангычы дәвам итә. Татарстан бюджетында быел үзара салым акчаларын өстәмә финанслау өчен 1 352,1 миллион сум тәгаенләнде”, – дип җавап бирде.