Казанда 15 марттан ярминкәләр башлана

Татарстан башкаласында 15 марттан язгы авыл хуҗалыгы ярминкәләре старт ала. Сәүдә 27 апрельгә кадәр дәвам итәчәк.

– Ярминкәләрдә товарларны сәүдә челтәрләрендәгедән уртача 15 процентка арзанрак бәяләрдән сатып алып булачак, – дип хәбәр итте “эшлекле дүшәмбе” киңәшмәсендә шәһәр Башкарма комитетының куллану базары комитеты рәисе Руслан Фазылҗанов.
Ит һәм яшелчә продукциясе белән беррәттән хуҗалык ихтыяҗлары өчен печән, салам, утын һәм башка кирәк-яраклар да тәкъдим ителә. Ярминкәләрдә

Татарстанның 22 муниципаль районы, шулай ук агросәнәгать комплексының 19 оешмасы катнаша.
– Мәйданчыкларда ветеринария-санитар таләпләрнең үтәлешен ачыклау шартлары тудырыла. Бу терлек һәм үсемлек продукциясенең сыйфат дәрәҗәсен контрольдә тотарга мөмкинлек бирә, – диде Руслан Фазылҗанов.

Авыл хуҗалыгы ярминкәләре шимбә көннәрендә 6.00-13.00 сәгатьләрдә оештырыла. Якшәмбе көннәрендә Беломор урамы,69 адресындагы ярминкә эшли.
Казан шәһәре Башкарма комитеты җитәкчесе Рөстәм Гафаров авыл хуҗалыгы ярминкәләренең социаль әһәмиятен искәртте.

– Шәһәр халкы ярминкәләрне көтеп ала. Пенсионерлар өчен авыл хезмәтчәннәреннән кулай бәядән сыйфатлы һәм яңа әзерләнгән продукция сатып алу мөмкинлеге бу. Шунлыктан ярминкә мәйданнары сатып алучыларга да, сатучыларга да уңайлы булсын, – диде Рөстәм Гафаров. Ул Казан районнары җитәкчеләренә әзерлекне карап чыгарга кушты.

Татар халык әкиятләренең кайберләре “ул мәҗелестә сый-нигъмәт мулдан иде, мыек чыланды, авызга эләкмәде”, дип тәмамлана. Шөкер, авыл хезмәтчәннәре мыекны да чылата, тамакны да туйдыра. Казанда узган елның 14 сентябреннән 29 декабренә кадәр оештырылган ярминкәләрдә 664,7 миллион сумлык продукция сатылган. Халык 773,7 тонна яшелчә, 253,6 тонна ит сатып алган.

Ярминкә мәйданнары адреслары
Авиатөзелеш районы:
Дементьев урамы,7; Ленинград урамы,27; Беломор урамы белән Гудованцев урамы киселешендәге урын.
Яңа Савин районы:
Хөсәен Ямашев проспекты, 71а; Академик Лаврентьев урамы,10.
Киров районы:
Революционная урамы,12.
Мәскәү районы:
Декабристлар урамы,133.
Совет районы:
Аграр урамы,2; Липатов урамы,7.
Идел буе районы:
Җиңү проспекты, 46в; Юлиус Фучик урамы, 64, корпус 1.
Вахитов районы:
Кәрим Тинчурин урамы белән Татарстан урамы киселешендәге урын.