«Телефонда утырганчы, китап укы!» Казанлылар балаларга нинди киңәш бирә?

Алексей Сметанин, инженер:

— Дөньяда цифрлы технологияләргә нык әһәмият бирелә, ул дәүләт идарәсендә, сәнәгатьтә һәм башка тармакларда киң кулланыш ала бара. Казанда узган Kazan Digital Week-2026 халыкара форумы моңа ачык дәлил.

Киләчәктә цифрлы технологияләр бөтен яшәешебезне колачлаячак әле. Яшь буын кәрәзле телефоннарда яки компьютерларда төрле уеннар гына уйнап утырмасын, ә технологияләрне өйрәнсен иде. Белгәнеңне ата-анаңа һәм өлкән туганнарыңа да аңлату яхшы.

Гөлнара Әнвәрова-Вәлиева, журналист:

— Хәзер без: «Заманасы шул бит, интернет, вакыт җитми», — дигән сәбәп табып, китап укымаучы балаларны акларга маташабыз. Һәм бу бик зур ялгышлык, дип уйлыйм. Чөнки, китап укудан кергән белемне башка беркайдан да алып булмый. Китап укыган баланың фикер йөртүе үк яшьтәшләреннән аерылып тора. Балаларны кечкенәдән үк китапка тарту мәслиһәт, ул мөһим тәрбия алымы. Кибетләрдә китапларның ниндиләре генә юк. Кызганыч, китапларның бәяләре генә «тешләшә».

Лилия Дәүләт, тарихчы:

— Татар энциклопедиясе төзүдә эшлибез. Энциклопедияләргә галимнәр һәм укытучылар өчен чыгарылган фәнни хезмәт рәвешендә генә карарга ярамый. Бу китапларга һәр кешегә файдалы колачлы мәгълүмат тупланган. Энциклопедияне өйдә «өстәл китабы» кебек көн саен уку зарур: гыйлем дә артачак, хәтер дә яңарачак. Татарстан шәһәрләре, Казан тирән тарихка ия. Без үзебезнең Татарстан һәм Россия тарихын белергә тиешбез.

Мансур Хәмидуллин, техник:

— Бала һәм үсмер чакта үзләштерелгән белемнәр хәтердә гомергә саклана. Мәктәп укучылары техник түгәрәкләрдә шөгыльләнсен. Әлбәттә, һәр бала да инженер һөнәрен сайламас, бу мәҗбүри таләп түгел. Ләкин, техник түгәрәкләрдә алган белем тормышта бик тә ярап куячак. Өйдә көнкүреш электр җиһазы яки автомобиль ватылса, үзең үк төзәтеп куясың. Интернетта мәгълүмат чиксез, шулардан хезмәтеңә һәм тормышыңа кирәклесен генә куллану кирәк.