«Исән чакта күрешик...», яки Ирек үз балаларын җыйды

Масаюсыз, мактанусыз
Ирек гөрләп яшәгән чакта тирә-юнен чит-ятлардан саклагандай урманнар уратып алган булса, бүген инде нигезләргә,  урамына читләр аяк басмасын дигәндәй, бөтенләй урман куенына сыенган. 
Авылның Җиләкле  ягы белән Чәчәкле ягын бер итеп уйнап үскән балалар дөньяның кайсы почмакларына гына таралышмаган. Казан, Чаллы, Ульяновск, Тольятти шәһәрләре, Пермь, Киров өлкәләре, Апас, Сарман, Бөгелмә... Кечкенә генә авыл никадәр бала үстереп, зур тормыш юлына озаткан. Артист та, космонавт та, философ та, язучы да юк. Гап-гади кешеләр, гади хезмәт ияләре. Бернинди масаю да, бернинди мактану да юк. Матур табигатьле авыл үз балаларында да матурлык тәрбияли алган. 

Изге ният
2021 елның 12 июне Спас районы Ирек авылы тарихында бик истәлекле көн булыр, мөгаен. Ни өчен дигәндә,  авылдашлар ничә еллардан соң нәкъ шул көнне очраштылар.  Һәм инде бергәләшеп зиратны чистартып, корбаннар чалып, намазлар укып, әрвахлар рухына догалар кылып, туып-үскән нигезләрне күреп китәргә дигән нияттән һәр елны шушы көнне очрашу көне итәргә дигән уйга килделәр. Бик хуп, бик изге гамәл. 
Әнә оештыру эшенең башында торган Тәлгать абый Җамалиев  авылдашларга: «Исән-сау чакта очрашыйк. Бер күрешү – үзе бер гомер. Ел буена җитәрлек җылы уй-хисләр белән таралышабыз. Киләсе елларга, кайткан авылдашларга тагын да күңелле булсын өчен, мөмкинлекләр булдырырга тырышачакбыз», - ди.
Ирек авылы төркемен булдырып, халыкны кабат берләштергән Гөлләр Җамалиева да: «Күңелдә рәхәтлек. Әрвахлар әйтерсең лә безнең очрашуларга шатланып озатып калган кебек тоела», – ди.

Авыл көтәр
...Авыл тын. Тагын бер елдан соң, Аллаһы боерса, балаларын ул кабат очраштырыр. Кендек каннары монда тамган, беренче тәпи киткән, балачаклары шушында үткән, дөньяның төрле почмакларына гомер юллары моннан башланган балалары бит ул аның. Исән-сау гына була күрсен һәрберсе, фәрештәләр саклап йөртсен үзләрен,  Аллаһы Тәгалә рәхмәтендә булсыннар. Ә ул көтәр, тын гына көтәр үзе үстереп чыгарып җибәргән һәрбер  баласының истәлекләрен хәтер почмагында саклап...

Алсу Сафиуллина, Казан.