Шәһри Казан

Күки җирләре кабат яшәрде

Балык Бистәсе районындагы Күки авылы кешеләре гомер-гомергә һөнәрле халык. Мондагы ирләр, колхозда эшләр кимегәч, читкә китеп төзү эшләре башкарса, хатын-кызлар Оренбург якларыннан йон, мамык алып кайтып шәл, оекбаш, бияләй бәйләп сата, терлек асрап, товарын базарга чыгара иде.

Реклама

Үзгәртеп кору заманы килмәсә, авыл халкы акчага кытлыкны сизмәс тә иде. Тик ун ел элек яңарыш җилләре аларның күмәк хуҗалыгын тәмам туздырып ташлады. Ун ел буе мондагы җирләр чәчелмичә буш торды.
Соңгы елда бирегә инвестор булып «Кулон» ширкәте килде. Башта озак буш яткан җирне йомшартып эшкәрттеләр. Быел көзен җиргә көзге ашлык чәчеп калдырдылар. Кырларда уҗымнар яшәреп киткәч, авыл кешеләре күңелендә өмет уянды: авыл юкка чыкмый, яши, диләр хәзер монда.
Илебездәге хәллерәк оешмалар, авылларны саклап калу өчен, үзләренең акчаларын кызганмый. Авыл кешеләре үзләре дә терлек, кош-корт асрап көн күрергә азаплана. Хәзер биредә 4-5 сыер асраучы гаилә фермалары бар. Алар, Казанга товар алырга килүче машиналарга утырып, башкалабызга сөт, май, каймак, эремчек китерә. Көнозын базарда шуларны саткач, товар ташучылар аларны үз авылларына алып китә.
Районның Ямаш, Кече Елга һәм тагын бүтән авыллары товар җитештерүчеләре дә Казан халкын яхшы сыйфатлы продуктлар белән тәэмин итеп тора. Базарларда Балык Бистәсе районыннан килгән авыл кешеләрен сатып алучылар, гадәттә, көтеп торалар. Кемнең сөте, эремчеге, каймагы тәмлерәк икәнен беләләр шул - гел бер хуҗабикәдән сатып алалар. Сөтләр, майлар чагыштырмача арзан бит: 500 граммлы бер йомарлам май - йөз, ярты кило каймак сиксән сум тора. Хәер, йомырка кыйммәтләнә. Бер-ике атна элек бер дистә күкәй илле сум торса, бүген ул алтмышка күтәрелде. Шәһәр кибетләрендәге бәя күтәрүләр авыл хезмәтчәннәренә дә күчә инде. Сатып алучылар, барыбер, авыл кешеләре китергәнне ала. Сыйфатлы, яхшырак, диләр.
Авыл кешеләре шәһәр халкын азык-төлеккә алдагы көннәрдә дә кинәндереп яшәр әле.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: