Рөстәм Миңнеханов: «Тукай районының күп юнәлешләр буенча күрсәткечләре яхшы, әмма...»

Очрашуда язгы кыр эшләренең барышы турында фикер алыштылар. Татарстан Республикасы вице-премьеры-авыл хуҗалыгы һәм азык-төлек министры Марат Җәббаров Тукай районының социаль-икътисадый үсеш күрсәткечләре буенча алдынгы урыннарны биләвен билгеләп үтте.

"Әлеге район - республикада иң эре ит җитештерүчеләрнең берсе. 508 мең тонна итнең 150 мең тоннасы нәкъ менә монда җитештерелә. Терлекчелек өлкәсендә зур проектлар гамәлгә ашырыла", - диде министр.

Ул билгеләп үткәнчә, бүгенгә Татарстанда чәчү 42%ка тәмамланган - 700 мең гектардан артык. Тукай районы бераз артта кала, әмма темпларны арттыру планлаштырыла.

Терлекчелек буенча районда узган ел йомгаклары буенча мөгезле эре терлекләр, шул исәптән сыерлар саны бераз кимегән. «Бу мәсьәләләрне игътибар белән өйрәнәбез, яңа перспектив проектлар турында фикер алышабыз», - диде Татарстан Республикасы Авыл хуҗалыгы һәм азык-төлек министрлыгы башлыгы.

Шул ук вакытта шәхси ярдәмче хуҗалыклар буенча район тотрыклы эшли. Авыл хуҗалыгы техникасының торышына аерым игътибар бирелде. Район хуҗалыкларында 539 трактор, 120 ашлык җыю комбайны, 20 азык җыю комбайны һәм 249 йөк автомобиле бар. Шул ук вакытта тракторларның һәм йөк автомобильләренең 60%ы амортизация срогыннан читтә файдаланыла. Ремонт һәм алмаштыру таләп ителә, моның өчен авыл хуҗалыгы дәүләт программаларыннан файдаланырга тәкъдим иттеләр.

Рөстәм Миңнеханов районның инфраструктура үсешенең мөһимлеген билгеләп үтте. Аерым алганда, ул төзелеш проектларын караганда юллар һәм социаль инфраструктура булуын исәпкә алырга чакырды. Шул ук вакытта республика Рәисе барлык республика программалары да гамәлгә ашырылачагына ышандырды, юл эшләренә аерым игътибар бирелә.

"Тукай районының күп юнәлешләр буенча күрсәткечләре яхшы, әмма омтылыр нәрсәләре һәрвакыт бар. Сез зур шәһәрләр - Чаллы һәм Түбән Кама белән янәшә торасыз. Бу җирле авыл хуҗалыгы җитештерүчеләре өчен зур сату базарлары", - диде Рөстәм Миңнеханов.

Шулай ук республика Рәисе «Ганиев Р.М.» КФХ механизаторы Рәфкать Борһановка «ТАССР төзелүгә 100 ел» медален тапшырды.

ТР Рәисе Матбугат хезмәте