Казан халкының торак-коммуналь хезмәтләр өчен түләнмәгән бурычы ике миллиард сумны тәшкил итә. Яңа Савин районында яшәүче бер гаиләнең бурычы 1 миллион 300 мең сумга җиткән инде хәтта.
Б ашкала мэры Илсур Метшин киңәшмәләрдә кат-кат искәрткәнчә, бурычларны кайтару зарури һәм мәҗбүри чара. Коммуналь түләүләрнең кермәве йортларга һәм инженерлык корылмаларына төзекләндерү үткәрүнең тиешенчә финансланмавына китерә.
- Казанда 50,5 мең кешенең - йөз мең сумга якын, 1700 гаиләнең 101 мең сумнан 300 мең сумга кадәр, 274 гаиләнең 600 мең сумга кадәр, ә 34 гаиләнең 600 мең сумнан да күбрәк бурычы бар, - дип белдерде шәһәрнең торак-коммуналь хуҗалык комитеты рәисе Искәндәр Гыйниятуллин.
Автоинспекция белән берлектә, «Мобиль пристав» программа комплексы гамәлгә кертелгән. Бурычлылар, автомобильләренең дәүләт теркәү саны буенча тиз генә ачыкланганнан соң, тоткарлана, милекләренә арест салына.
Россия Федерациясе Торак кодексының 90 нчы маддәсенә таянып, шәһәр хакимияте кырыс чаралар күрергә мәҗбүр.
- Торак-коммуналь хезмәтләр өчен түләмәүче алты гаилә судка бирелде. Аларның гомум бурычлары ике миллион сумга якын, - диде Искәндәр Гыйниятуллин.
Бурычлары 217 һәм 477 мең сум булган ике гаилә 27 һәм 53 квадрат метрлы фатирларыннан 9 һәм 12 квадрат метрлы бүлмәләргә чыгарыла. Өч гаилә бурычын түләп котылган, ә бер гаиләнең эше әле судта.
Искәндәр Гыйниятуллин: «Идарәче компанияләр бурычларны кайтару өчен судларга ел саен ун меңнән артык мөрәҗәгать җибәрә. Торак-коммуналь хезмәтләр өчен үз вакытында түләп барырга тырышырга кирәк. Әгәр гаилә сәбәпсез рәвештә алты ай дәвамында түләү башкармаса, хөкемгә бирелә. Кешеләрне фатирларыннан чыгару күңелле хәл түгел, ләкин шәһәр хакимияте күп бурычлары җыелган гаиләләргә шушы кырыс чараны да күрергә мәҗбүр булачак», - дип кисәтте.
Иң мөһим һәм кызыклы язмаларны Татмедиа Telegram-каналында укыгыз
