Шәһри Казан

Татарстан сәламәтлек саклау министры урынбасары Владимир Жаворонков: «Татар теленә өйрәткәне өчен, бабама рәхмәт»

Соңгы арада Татарстан сәламәтлек саклау министры урынбасары, Казан шәһәренең сәламәтлек сак­лау идарәсе җитәкчесе Владимир Жаворонковның татарча сөйләшүен еш ишетергә була. Телевидениегә татарча интервьюлар да бирә ул. Аңа сокланып, гаҗәпләнеп караучылар җитәрлек. 35 яшьлек җитәкченең татар телен үзләштерүе турында үзе белән сөйләштек.

– Владимир Владимирович, татарча күптәннән сөйләшәсезме?
Балачактан. Үзем – Казанныкы. Минем бабам татар иде – Багданов Рифкать Закуан улы. Ул мине кечкенәдән «татарча сөйләшә белергә тиешсең», дип үстерде. Бабам тумышы белән Башкортстан чигеннән. Нәсел тамырлары Дәүләкән якларына барып тоташа. Казанда үскән. Мине татарчага өйрәткәне өчен, аңа чиксез рәхмәтлемен.

Татар телен белү тормышта ярдәм итәме?
– Әлбәттә, телләр белү һәр­чак кирәк. Саф татарлар яшә­гән районнарга, әйтик, Акта­нышка баргач, үземне баш­калардан ким хис итмим, чөнки татарлар нәрсә сөйләгәнне аңлыйм. Табиб буларак, халыкны кабул иткәндә дә телне белүем ярдәм итте. Татар телле пациентларга дәвалану алымнарын аңлатканда, беркайчан да проблема туганы булмады. Алар да борчыган авырулары турында иркенләп аңлаталар иде. Уңай мөнәсәбәт пациент белән табиб арасындагы мөнәсәбәтләргә, хәтта дәвалануга да тәэсир итә.

– Соңгы арада инстаграм битендә татарча язмаларыгыз да күренә башлады.
Без ике телле дәүләттә яшибез. Мин ике телдә сөйләшәм икән, инстаграмдагы битемне татарча, русча алып бару гадәти хәл.

Реклама

– Гаиләгездә татарча сөйләшәсезме?
Хатыным татар – Алия. Балаларыбыз Федор белән София киләчәктә татарчаны бе­лә­чәкләр. Ничек, нинди чыганаклардан өйрәтергә икәнен уйлап бетерербез, алар әле кечкенә. Моны алар аңлап эшләргә тиеш. Максатым – балаларга, үземә дә әдәби татар телен бар нечкәлекләрен белеп өйрәнү түгел, иң мөһиме – татарча аралаша алу, фикеремне белдерү, бу телне аңлау.

– Татарча әсәрләр укыйсыз­мы, җырлар тыңлыйсызмы?
Юк диярлек. Вакыт та җитеп бетми. Кечкенә чакта әдәби әсәр укып караган идем, авыр бирелде. Җырчылардан Илһам Шакировны хөрмәт итәм. Салават Миңнехановның иҗатын тәкъдим итү алымнары ошый.

– Телне өйрәнүдә иң авыры нәрсә булды?
– Минем өчен яңа сүзләрне истә калдыру авыррак. Кызганыч, бабам вафат. Аның белән аралашып торганда, телне өйрәнү җиңелрәк иде. Ләкин бүген татар телен уку мөмкинлек­ләре җитәрлек. Дәүләт чи­нов­никлары өчен татар теле­нә өйрәтә торган махсус курс­ларга язылдым.

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: