Аромашәмнәр һәм диффузорларның зыяны бармы? Галимнәр ни ди...

Беренче карашка зыянсыз вә тәмле ваниль һәм чәчкә исләре организмга начар тәэсир итә  аламы? Әлеге темага карата белгечләр җавабын бер урынга тупладык.

Без барыбыз да өйдә җиңелчә тәмле хуш ис хөкем сөрүен яратабыз. Төрле ароматлар уңайлы мохит тудыра, авыр көннән соң ял иттерә яки, киресенчә, энергия белән тулыланырга ярдәм итә. Нәкъ менә шуңа күрә хуш исле шәмнәр, диффузорлар, эфир майлары салынган таякчыклар йорт өчен алыштыргысыз аксессуарлар рәтендә тора да инде. Алар безгә хуш исле һава, романтик кәеф һәм хәтта “терапевтик” тәэсир вәгъдә итә. Тик! Бер нюанс бар: вакыт-вакыт бу хуш исле “химик коктейльләр” безнең сәламәтлегебезгә зыян китерергә сәләтле, дигән куркыныч тикшеренүләр барлыкка килә һәм безне шомга сала...

Мәсәлән, Америкадагы Пердью университетының яңа тикшеренүе әлеге хуш исле продуктларны куллану һава сыйфатын бик нык начарайтырга сәләтле икәнен күрсәткән. Бинадагы һава җылынганда алар үпкәләргә тирән үтеп керергә һәм хәтта канга эләгергә сәләтле нанокисәкчекләр бүлеп чыгара, шул рәвешле сәламәтлек белән проблемалар да тудыра. Галимнәр бу кисәкчекләрнең концентрациясе газ плитәләре, дизель двигательләре һәм традицион шәмнәр чыгарылмаларына тиң булуын ачыклаган. Галимнәр кисәтә: биналарда вентиляция системаларын проектлаганда, шулай ук йорт өчен хуш исле продуктлар сайлаганда бу процессларны исәпкә алырга кирәк! Бары тик ГОСТ таләпләренә ия һәм сертификатлары булган хуш исле җайланмаларны сайлап алырга тәкъдим итә алар.

Яраткан хуш исләрегездән сәламәтлеккә зыян китерми генә ләззәт алу өчен гади кагыйдәләрне куен дәфтәрегезгә язып алыгыз:

1. Табигый балавызлы (умарта, соя, кокос) һәм металл нигезсез фитильле шәмнәр сайлагыз;

2. Составында билгесез “парфюмер композицияләр” булган кискен синтетик ароматлардан һәм продуктлардан сакланыгыз;

3. Хуш исле шәмнәрне көненә 2-3 сәгатьтән дә артык яндырмагыз;

4. Аромаҗайланмалар кулланганнан соң бүлмәне җилләтегез;

5. Диффузорларның составына игътибар итегез – нигезендә синтетик эреткечләр түгел, ә спирт яки табигый майлар булса яхшырак.