“Имин һәм сыйфатлы автомобиль юллары” илкүләм проекты кысаларында Аксубай районында автомобиль юлы төзекләндерелде. Чистай – Аксубай – Нурлат маршруты буенча ялтырап торган асфальт җәелде.
Төзекләндерелгән участокның озынлыгы 2,6 чакрым гына тәшкил итсә дә, ул дүртенче техник категория нормативлары буенча яңартылган. Юлның киңлеге хәзер җиде метр тәшкил итә.
Әлеге илкүләм проект кысаларында быел Татарстанда 77 участокта 108.3 чакрым араны тәшкил иткән төбәк юллары төзекләндереләчәк. Бу хакта Татарстанның транспорт һәм юл хуҗалыгы министрлыгы матбугат үзәге хәбәр итте.
