Татарстан автотранспорт предприятиесе ассоциациясе башлыгы Сергей Темляков Казанда җәмәгать транспорты бәясен 5 сумга күтәрү турында әйткән, дип яза “Татарстан-24”.
Темляков әйтүенчә, пассажир йөртүчеләр “бик авыр хәлдә”. Шәһәрнең транспорт предприятиеләре QR-кодлар аркасындагы югалтулар өчен республика бюджетыннан компенсация алмаган. Шул ук вакытта ягулыкка һәм запас частьларга бәяләр күтәрелгән. Ә хезмәткәрләргә хезмәт хакын арттырырга кирәк, чөнки продуктка бәяләр күтәрелә, дигән ассоциациясе башлыгы.
“Пассажир йөртүчеләрнең бердәнбер керем чыганагы – пассажирларның транспорт өчен түләгән акчасы. Бу катлаулы хәлдән чыгу юлын тарифларны яңадан карауда һәм гражданнарның ташламалы категориясен йөрткән өчен компенсация алуда күрәләр. Алар бәяне 27 сумга кадәр күтәрергә дип саный. Яки банк һәм транспорт картасы буенча, шулай ук акча белән түләгәндә 5 сумга арттырырга кирәк дип уйлыйлар”, - ди Темляков.
Иң мөһим һәм кызыклы язмаларны Татмедиа Telegram-каналында укыгыз
