Биектауда тимер кар бабай

Умартачы да ул, тимерче дә, капкалар, чардуганнар, теплицалар ясый; балта остасы, агачтан төрле могҗизалар тудыра; техниканы да биш бармагы кебек белә, үзе җыйган тракторы белән җир сукалый; ташчы, йортлар сала. Бу юлы безне тимердән эретеп ясаган кыш бабайлары, кар кызлары, кар бабайлары белән шаккатырды. Капка алды үзе бер әкият кебек, арбалы боланы да бар, бер читтә ел символы – күсе утыра, барысы да төсле утлар белән ялтырап, балкып тора. Кыш бабайның, кар кызының төп каркасын Мәсхүт абый тимердән эретеп ябыштырып ясаган. Кар юк дип аптырап тормаган, тимерне азык-төлек төрү өчен кулланыла торган пленка белән томалаган. Үтеп барган һәр кеше Мәсхүт абыйның сыннарына сокланып уза.