Буа районында су баскан күпер аша чыкканда трактор суга төшеп китеп, бер егет батып үлгән

 Зөя елгасы аша чыга торган күперне су баскан. Район үзәгенә ул юлдан тизрәк барып җитәргә була икән аның аша.

Су баскан очракта ул юлны ябып, Тәтеш районы аша йөриләр, әмма ул юл унбиш чакрымга озыная. Күрше авылдан ике егет Мәскәүгә эшкә барырга тиеш була һәм алар тракторчыдан елга аша чыгаруын сорыйлар.

Күперне чыкканда, тракторның руле борылып китеп, суга төшеп китәләр. Тракторчы белән бер пассажир йөзеп чыга, берсе су астына китә. Исемен атарга теләмәгән Кыят авылы кешесе безгә сөйләгәнчә, кырыйда боз булган, имеш, ул боз астына кереп киткән.

Ни кызганыч, гәүдәсен таба алмаганнар, агымсу алып киткән, дип фаразлыйлар.

Тракторны махсус транспорт белән чыгарганнар. Үлгән егетнең гәүдәсе трактор эчендә түгелме икән, дип тә өметләнгәннәр. Әмма аның гәүдәсе биредә табылмаган. 

Зөя елгасының тирәнлеге бу урында 4-5 метрга җитә. ди. Егеткә 30 яшьләр тирәсе булган.