Кайбер россиялеләрне ана капиталыннан мәхрүм итәргә тәкъдим ителде

Дәүләт Думасы депутаты Виталий Милонов чит илдә бала табучы россиялеләрне ана капиталыннан мәхрүм итәргә тәкъдим итте. Бу хакта ул «Говорит Москва» радиостанциясе эфирында әйткән.

Парламентарий фикеренчә, хатын-кызлар үзләренә һәм балаларына икеләтә гражданлык тәэмин итү өчен махсус чит илгә китә, шуңа күрә алар Россия социаль программаларына исәп тотмаска тиеш.

—Чит илгә бала табарга китүчеләр ана капиталына дәгъва итмәскә тиеш. Аргентинада бала табу өчен акча түләгән икән, аның турында Аргентина кайгыртсын, - дип ассызыклаган Милонов.

Депутат фикеренчә, ана капиталын алу өчен әни кешенең дә, баланың да Россия гражданнары булуын күрсәтергә кирәк. Россия Федерациясендәге кебек социаль программалар беркайда да юк, дип өстәгән депутат.

Элегрәк Аргентина миграция хезмәтенең Милли директоры Флоренция Каригнано хәбәр иткәнчә,  бала табу аша гражданлык алган, әмма Аргентинада яшәргә калмаган россиялеләрдән яшәп торырга рөхсәт тору кәгазен кире ала башлаган. Аның сүзләре буенча, Буэнос-Айрес мондый очракларны киметергә тели.