Мәскәү – Казан тизйөрешле тимер юлын Чаллыга кадәр озайтмакчылар

Мәскәү – Казан тизйөрешле тимер юлын Чаллыга кадәр озайтмакчы булалар. Бу хакта Татарстан Республикасы транспорт һәм юл хуҗалыгы министры урынбасары Айрат Усманов хәбәр итте. Тимер юл Чаллыдан 20 чакрым аралыкта урнашкан Тихоново станциясенә кадәр сузылачак. Айрат Усманов сүзләренчә, бу сорауны июнь ахырында «РЖД» җыелышында күтәрәчәкләр. Магистральне төзер өчен 400 млрд сум акча кирәк булачак. Ләкин бәясе, җир өстендә яки эстакадада төзелүенә карап, үзгәрергә мөмкин. Хәзерге вакытта Мәскәү – Казан тизйөрешле тимер юл магистрале төзелешен 1,69 трлн сумга бәялиләр.