“Пилмән” белән “Сырхау” карарга килегез...

Әлеге чарада фильмнарда төп рольләрне уйнаган Камал театры артистлары катнаша.

Тамашачылар игътибарына "Пилмән", "Сырхау" һәм "Ишекне япты да китте" дигән 3 комедия тәкъдим ителә.

Режиссер Салават Юзеев төшергән "Ишекне япты да китте" фильмы XI Казан халыкара мөселман киносы фестивалендә - "Кыска метражлы иң яхшы уен фильмы" һәм "Кыска метражлы уен фильмында иң яхшы ир-ат роле" номинацияләрендә икеләтә җиңү яулады. Иң яхшы ир-ат роле исеменә Г.Камал исемендәге Татар дәүләт академия театры, Татарстанның халык артисты Илдус Габдрахманов лаек булды.

Кыска метражлы татар фильмнарын тәкъдим итү кичәсендә проектның иҗат төркеме - режиссер һәм сценарий авторы Салават Юзеев, сценарий авторы Ркаил Зәйдулла, оператор Илшат Рәхимбай, икенче режиссер Радик Бариев һәм Камал театры артистлары катнаша.

Фильмнар сәгать 15.00 күрсәтелә башлый. Чарага керү - бушлай, дип хәбәр итә театрның матбугат хезмәте.