Подгузник малайларга зыянлы

Быел эстафетаны Казан кабул итеп алды. Конгресста төрле илләрдән, чит төбәкләрдән 700ләп табиб җыелды. Алар конгресс кысаларында ир-атларга кагылышлы авырулар, аеруча җенес бизе авырулары турында сөйләштеләр.

- Ирләр сәламәтлеге - Татарстан өчен көнүзәк проблема, 2012 елдан башлап Татарстанда беренчел җенес бизе авырулары 35 процентка артты. Безне барыннан да бигрәк ир-атларның сәламәтлекләренә карата битараф булулары борчый. Алар диспансеризация үтәргә ашыкмый, табибларга сирәк мөрәҗәгать итә. Исерткеч эчемлек кулланучы, тәмәке тартучыларның күпчелеге - ир-атлар. Шуңа да ир-атларның уртача гомер озынлыгы хатын-кызларныкы белән чагыштырганда 11 елга кыскарак, - ди Татарстанның сәламәтлек саклау министры Адел Вафин. Татарстан Сәламәтлек саклау министрлыгының штаттан тыш баш урологы Ринат Галиев әйтүенчә, ир балаларга подгузник киертү нәсел калдыруга тискәре йогынты ясый.