Тикшерү бүлегеннән 15 миллион сум һәм җинаять эше булган папка урланган

Казанда Россия тикшерү комитетының Татарстандагы бүлеген талаганнар: 15 миллион сум һәм җинаять эше булган папка урланган.
Югалган материалларны Мәскәүгә тапшырырга әзерләнгәннәр.

Татарстан буенча Тикшерү комитетының бер бүлегендә эшләүче тикшерүче кабинетыннан билгесез кешеләр 15 млн сум һәм Мәскәүгә, Россия тикшерү комитетының үзәк аппаратына күчерелергә тиешле җинаять эшләренең берсе урланган.

Беренчел версия буенча, җинаятьчеләр бинага якшәмбедән дүшәмбегә каршы төнлә үтеп кергән. Камералар бинага битлек кигән берничә ир-ат килгәнен теркәгән, алар күзәтү камерасына скотч ябыштырган һәм ишекне ватканнар. Ни өчендер төнлә мөһим объект сакланмаган.