Ватсаптагы чаттан алып аткан өчен бер яшь анага пычак белән кадаганнар

Аны әти-әниләр комитеты чатыннан шунда язышучы башка кешеләрнең гозере белән алып аткан булганнар.

Зыян күргән Анастасия Михайлова хәзерге вакытта хастаханәдә ята. Зыян күрүче сөйләвенчә, һөҗүм иткән ханым Донецкидан күченеп килгән. Аларның балалары бакчага бер төркемгә йөргән. Ватсаптагы чатта аның һәрчак зарлануы, мескенләнеп гел соранып утыруы әти-әниләре тәмам туйдырган булган. Карап торышка, баласы да яхшы киенгән, мохтаҗга охшамаган, ә үзенең исә гел такси белән йөрүе, башка төрле фикер тудырган. Ахырда урынсыз зарлануыннан туйган әти-әниләр Анастасиягә аны төркемнән алып атуын сораганнар.

Үзен "төшереп калдыруларын" аңлаганнан соң ул Анастасиягә кабат, аны чатка өстәвен сораган. Соңрак аңа янау-куркытулы хатлар җибәрә башлаган. Хәтта берсендә аны баласы белән машинада шартлатам, дип тә янаган булган. Аларны зыян күрүче саклап кала алмаган, чөнки хат укылуга мәкерле хатын аны бетереп барган.

Балалар бакчасы тирәсендә ул ике атна чамасы күренмәгән. 5нче февральдә алар садик ишеге төбендә очрашалар. Ачулы хатын Анастасияне эткәләп урамга чыгармакчы була. Ике хатын эткәләшә башлыйлар һәм шулчак һөҗүм итүче "дошманы"ның маңгаена пычак белән суга. Андагы тавышка урамнан хатын-кызлар килеп кереп, ярдәмгә киләләр - хокук сакчылары һәм "ашыгыч ярдәм"  чакырталар. Һөҗүм иткән хатын-кыз тикшерүчеләр килгәнче пычактагы канны сөрткән була. Дәлилләр булмаганлыктан җинаять эше ачылмаган. Анастасия хәзер әлеге хәлнең шаһитләрен эзли һәм киләчәктә җинаять эше ачтырырга җыена.