«Зәкят» фонды мохтаҗларга хәйрия ашлары әзерләү эшен кабат башлап җибәрде

Бушлай кайнар ризык порцияләре атнага 3 тапкыр – сишәмбе, чәршәмбе һәм җомга көннәрендә 10.00дән 11.00гә кадәр Казанның Борһан Шаһиди скверында (Борһан Шаһиди урамы, 17) таратыла. Мохтаҗларга беренче һәм икенче аш, салат, ипи, чәй тәкъдим ителә.

Шунысын билгеләп узарга кирәк: 2017 елда «Зәкят» фонды оештырган хәйрия ашларында кайнар ризык белән сыйланган фәкыйрьләр саны 3000 меңнән артып ките.

Моннан тыш, Казан мәчетләрендә мохтаҗларга әйберләр һәм азык-төлек җыю дәвам итә. Искәртеп үтик: диния нәзарәте башлангычы белән башкала мәчетләрендә фәкыйрьләргә бушлай ярдәм күрсәтү буенча «Приют» пункты өчен кием-салым, азык-төлек, савыт-саба һәм башка кирәк-яраклар җыю игълан ителде.

Олылар һәм балалар өчен кием-салым, озак бозылмый торган азык-төлек (тоз, шикәр, ярмалар, консервалар һәм башкалар), савыт-саба, уенчыклар, көнкүреш химиясе товарлары башкаланың түбәндәге мәчетләрендә кабул ителә: Кабан арты мәчете (Һ.Такташ урамы, 26), Гаилә (Җ.Фәйзи урамы, 2), Ярдәм (Серов урамы, 4а), Нур-әл-Ислам (М.Бигиев урамы, 36/56), Казан Нуры (Ф.Әмирхан урамы, 3, корп.2), Фатиха (Кадышево бистәсе, Р.Зорге урамы, 2а), Өмет (Борисоглебский бистәсе, Мәктәп урамы, 4а), Салихҗан (Бестужев урамы, 66а).

Моннан тыш, кирәк-яракларны тәүлек әйләнәсе эшли торган «Приют» ярдәм пунктына да (Б.Шаһиди урамы, 26 нчы йорт) китерергә мөмкин.

Фото: islam-today.ru