«Алтын каләм» фестивале этабында иң яхшы яшь журналистлар җыелачак

Барлыгы 356 гариза килгән. Бәйге нәтиҗәләре буенча фестивальдә катнашу хокукына Татарстанның төрле почмакларыннан медиа өлкәсендә актив шөгыльләнүче 14 яшьтән 24 яшькә кадәрге 106 укучы һәм студент кына ия булган. Бу хакта «Татар-информ» да узган матбугат конференциясендә ТР Яшьләр эшләре буенча министр урынбасары Айгөл Сабирова хәбәр итте.

Фестивальдә катнашучылар Филология һәм мәдәниятара багланышлар институтында һәм КФУның Югары журналистика мәктәбендә, «Татарстан» ДТРК, ТНВ, «Шаян ТВ» да, «Болгар радиосы» Радио мәйданчыгында, шулай ук «вертолет» яшьләр үзәгендә экскурсияләр белән булачаклар. Программа блогерлар белән очрашуларны, практик мастер-классларны һәм үз медиапродуктларын әзерләүне үз эченә ала. Катнашучылар «Заречье» лагеренда яшиләр.

Фестиваль ике форматта уза – онлайн һәм офлайн. Конкурс программасы сигез индивидуаль һәм ике коллектив номинацияне үз эченә ала. Катнашучыларда иң зур кызыксынуны «Телевидение һәм видеоблогинг» (16 катнашучы), «рус телендә басма журналистика» (14) һәм «Фотожурналистика» (13) юнәлешләре уяткан.

Икенче мәртәбә Татарстан югары уку йортлары һәм махсус урта уку йортлары студентлары медиаүзәкләре өчен трек уздырыла. Катнашучылар Гаилә елы, фәнни-технологик үсеш, патриотик тәрбия, сәламәтлек саклау һәм милләтара бердәмлек темаларына проектлар әзерлиләр. Иң яхшы коллективлар медиаүзәкләрне үстерүгә 1 млн сумга кадәр сертификат алачак.

Фестиваль җиңүчеләре югары уку йортында «медиа» юнәлеше буенча укырга Гран-при – сертификат, шулай ук индивидуаль номинацияләрдә лауреат дипломнары һәм махсус бүләкләр алачак.