Җәмәгать урыннарында һәм урамнарда җинаятьләр саны күпкә кимегән

Татарстан буенча Эчке эшләр министры Дамир Садретдинов җиденче чакырылыш Дәүләт Советының җиденче утырышында хәбәр иткәнчә, соңгы 30 елда шәхескә, шул исәптән тормышка һәм сәламәтлеккә каршы җинаятьләр саны былтыр рекордлы күләмдә аз теркәлгән. Үтерүләр һәм аңлы рәвештә сәламәтлеккә җитди зыян китерүләр саны чирек өлешкә диярлек кимегән. Талау һәм урлау очраклары да азайган.
Җәмәгать урыннарында һәм урамнарда күпкә куркынычсызрак булган – монда җинаятьләр саны соңгы 20 ел эчендә иң аз күләмдә теркәлгән. “Элек хөкем ителгән затлар тарафыннан һәм исерек хәлдә кылынган җинаятьләр саны да чирек өлешкә кимегән, көнкүреш характерындагылары – 17 процентка”, – диде докладчы.