Авыл халкын да куркытырга өлгерде бу хәбәр

Бүген иртәдән мессенджерларда, фатирлар буйлап шәфкать туташлары йөри, пенсионерларга прививка кадыйлар һәм өлкән кешеләр өч көн эчендә үлә икән, теләсә кемгә ишек ачмагыз, дигән кисәтүле видео таралды. Имештер, шәһәрдә генә түгел, авылларда да йөриләр ди. 
Татарстанның Сәламәтлек саклау министрлыгы, моңа җавап итеп, социаль челтәрләрдә бу хәбәрнең дөреслеккә туры килмәвен хәбәр итә.  
“"Игътибар, фейк! Түбән Камада мессенджерларда медицина хезмәткәрләренең фатирлар буйлап йөрүләре һәм пенсионерларга прививкалар ясавы турында мәгълүмат таратыла башлады. Хәбәрдә әлеге прививка үлемгә китерә диелә. Әлеге мәгълүмат чынбарлыкка бөтенләй туры килми. Татарстанда өйдә вакцинация үткәрелми: бары тик беренчел звено медицина учреждениеләрендә генә, табиб карагач һәм кешенең сәламәтлегенә зыян китермәгән очракта гына. Мессенджерлар һәм социаль челтәрләр аша таратыла торган мәгълүматка сак карарга һәм бары рәсми чыганаклардан гына файдалануыгызны сорыйбыз” диелә министрлык белдерүендә.
Түбән Камада гына түгел, район авыллары мессенджерларында да таралып, халыкны куркытырга өлгерде инде бу хәбәр.